Melendi cellebra 10 años de conciertos cola xira “menos egoísta” de la so carrera, pensada pa que los sos siguidores disfruten incluso d’unes canciones qu’escribió nun momentu que yá nun lu representa y a les que, como diz nún de los sos temes recientes, depués quiciás-yos “pieslle los güeyos” pa siempre.

“Nun m’arrepiento de nada, pero son canciones que fice d’adolescente, de la que me creyía’l rei del mundu”, explicó güei en rueda de prensa l’intérprete y compositor asturianu, en referencia a cortes qu’igual nun va volver tocar, como “Wel informe del forense” o “Son noticias de Holanda”, del discu del mesmu nome, publicáu en 2003.

Inda recuerda “la sensación d’euforia” que siguió al so primer conciertu en Toro (Zamora), de que tien pasao una década na qu’él evolucionó en tolos órdenes y na que sucedió de too, “delles coses negatives”, dixo en referencia probable a los sos probles coles drogues del pasáu, “anque’l balance final ye positivu”.

Les alusiones burllones y un tanto infantiles de dellos de los sos primeros temes a los estupefacientes nun ye lo único que quedó atrás. “Nun voi volver a la rumba”, pronostica Melendi, anque cola boca pequeña, de la que vislumbra la publicación d’un nuevu discu pa payares.

Nel so séptimu álbum d’estudiu va volver cambiar el “traxe”, como nos sos últimos trabayos, anque van mantener les coordenaes humorístiques y de ciertu costumismu qu’abunden nel so repertoriu y qu’en 2013 lu convirtieron nel artista nacional que más públicu atropó nos sos conciertos, non asina’l favor de la crítica especializada.