El misteriu qu’arrodia’l cuerpu de Lisa Gherardini, la modelu inmortalizada por Leonardo Da Vinci en La Gioconda, pue resolvese 600 años depués de la so muerte, yá qu’expertos forenses y antropólogos trabayen yá col ADN d’unos restos óseos que podríen corresponder a esta noble florentina.

El paraderu del cuerpu de Lisa Gherardini del Giocondo ye ún de los secretos meyor guardaos de la hestoria del arte, yá que nengún hestoriador nin antropólogu forense llograra esclarar ónde s’alcuentra la musa de Da Vinci, que morriera según documentos de la dómina en 1542.

Sábese que fuera enterrada nel conventu de Santa Úsula en Florencia, según consta en documentos na ilesia qu’asina lo corroboren. Va dos años, un comité científicu desenterró l’esqueletu d’una muyer contemproanea de Lisa Gherardini. Pa la so identificación abrióse’l pasáu agostu de 2013 la Capiella de los Mártires na basílica de la Santísima Anunciación de Florencia, onde ta enterrada la familia Gherardini.

Del cagüercu extraxéronse los restos del so home, el comerciante florentín Francesco del Giocondo y de ún de los sos cinco fíos, Piero, amás de Bartolomeo, otru fíu, frutu del primer matrimoniu del Gocondo. Dende entós a agora, los cuerpos fueron sometíos a bien d’exámenes científicos pa determinar si verdaderamente pertenecen a la familia Del Giocondo, yá que la capiella fuera vendida a otra familia nel sieglu XVIII.

Los resultaos fueran favorables y agora’l secretu parez tar a puntu revelase, pues un equipu d’investigadores de la de la Universidá de Boloña compara l’ADN de os restos óseos afayaos en Santa ürsula col de los familiares de la modelu inmortalizada por Da Vinci alredor de 1506.