El prestixosu poeta exipciu Ahmed Fuad Negm morrió güei en El Cairo a los 84 años d’edá, apagándose una de les voces más crítiques y populares del país. Tolos medios exipcios destaquen nél la voz más revolucionaria y identificativa de les clases populares.

Ñacíu en 1929 na provincia d’Al Sharquiya, nel delta del Nilo, convirtióse nún de los poetes más importantes na llingua coloquial n’Exiptu de la segunda metada del sieglu XX. D’orixen humilde, vivió nun güerfanatu y trabayó como pastor, unes experiencies qu’impregnaron los sos poemes nos que describe la vida de los probes del so país y denuncia les inxusticies sociales.

El poeta tuvo involucráu en política y fue mui críticu colos rexímenes d’Anuar el Sadat y Hosnu Mubarak, lo que lu llevó a acabar bien de veces na cárcel. Ente la so obra destaca “Valiente ye valiente” y el conxuntu “Escenes de la vida na cárcel”, escrito durante una de les sos estancies en prisión.

Dellos de los sos poemes fueron cantaos polos activistes presentes na emblemática plaza cairota de Tahrir durante la revolución de 2011, que llevó al derrocamientu de Mubarak. Tres de la revolución participó na formación de dellos partíos de tendencia lliberal y tamién denunció l’actuación del presidente islamista Mohamed Mursi, depuestu nun güelpe militar el pasáu 3 de xunetu.

Siempre mantuvo un estilu de vida mui humilde, viviendo n’azotea del barriu popular de Bulaq al Dakrur, y alióse col compositor Sheij Imam, que cantó dellos de los sos poemes convirtiéndolos en pieces bien populares.

El funeral ta previsto que se cellebre na importante mezquita d’Al Husein, nel centru d’El Cairo islámicu.