Alvierte de que nun hai recuperación con trabayu más precariu y salarios de 800 euros

El coordinador d'IX Asturies, Manuel González Orviz, calificó güei d'alarmantes los datos relativos al aumentu de contratos parciales, que yá suponen casi un 50% de les nueves contrataciones. “Pasemos d'atopanos con una importante baxada nel númberu de contrataciones indefiníes pa, amás, constatar que casi la metá de los nuevos contratos indefiníos son a tiempu parcial, lo que supon una precarización llaboral ensin precedentes”, afirma'l coordinador d'IX Asturies. A estos datos súmase-y l'aumentu del paru rexistráu n'España nel mes d'ochobre respecto al mes anterior, 87.028 persones más nes llistes del paru.

Per otru llau los salarios de los trabayadores tamién sufrieron una amenorga considerable, como reflexa'l   INE (Institutu Nacional d'Estadística), especialmente ente los trabayadores más nuevos.

El salariu brutu n'España asítiase en redol a unos 15.500 euros añales, lo que supon unos 800 euros mensuales, alvierte Orviz. Ante estos datos, “por desgracia hasta'l términu mileurista” quédanos grande yá”, sostien el coordinador d'IX Asturies.

Estos datos, a xuiciu de Orviz, dexen claro que contrariamente a lo afirmao pol Partíu Popular non yá nun se ta ameyorando'l panorama d'emplegu, sinón que se ta amenorgando de forma alarmante'l númberu de contrataciones indefiníes, que son sustituyíes por emplegos precarios, temporales y a tiempu parcial.

Pa Manuel González Orviz la reforma llaboral y les polítiques de reactivación económica entamaes pol Partíu Popular son un atayante fracasu “cuidando que aumentó'l paru, fuéronse sustituyendo emplegos estables y calidable por trabayu precariu, temporal y a tiempu parcial y los trabayadores sufrieron rebaxes salariales cola consiguiente perda de poder adquisitivu”.