Nun comunicáu, la compañía esclara que los sos nuevos motores EU 6 n'Europa cumplen los requisitos llegales y medioambientales establecíos, y comprométese a informar de forma "constante y tresparente" sobre les sos investigaciones sobre l'alteración de datos sobre emisiones.

   La compañía indica que la provisión va tener efectos sobre la cuenta de perdes y ganancies del tercer trimestre del añu, lo que va afectar a los resultaos del conxuntu del exerciciu. Como les investigaciones tán abiertes, la cantidá podría quedar sometida a revisión.

   Volkswagen ta "trabayando a toa velocidá" pa esclarar les irregularidaes sobre'l 'software' utilizáu nos sos vehículos estaounidenses, afirma'l comunicáu, según el que los nuevos vehículos con motores EU 6 diésel disponibles n'Europa cumplen con tolos requisitos llegales.

   Les investigaciones internes de la compañía, señala, consideren qu'esti 'software' tamién ta instaláu n'otros vehículos diésel del grupu Volkswagen, magar "na mayoría d'estos motores el 'software' nun tien nengún efectu".

   Les irregularidaes afecten a motores de tipu EA 189, instalaos n'once millones de vehículos en tol mundu. Les esviaciones detectaes nes pruebes d'emisiones solo s'usen nesti tipu de modelos, sorraya la compañía.

   "Volkswagen ta trabayando enforma pa esaniciar estes esviaciones" y alcuéntrase en contactu coles autoridaes federales alemanes, la Motor Transport Authority (KBA, Kraftfahrtbundesamt).

   La compañía tamién asegura nel comunicáu que nun va tolerar nenguna violación de la llexislación y que caltién como prioridá la recuperación de la confianza perdida ente los sos veceros.