El Tribunal Supremu anuló la condena de 29 años impuesta pola Audiencia Nacional a la miembru d'ETA Oihana Mardarás por participar nel atentáu contra la sede de la Radio Televisión Pública Vasca (EiTB), que se produxo'l 31 d'avientu del 2008 en na cai Capuchinos de Bilbao.

   L'atentáu llevólu a cabu'l comandu 'Basakatu' d'ETA, a les ordes d'Ibai Beobide. A últimos del 2008 los sos integrantes iguaron un artefactu con ente 80 y 100 quilos d'esplosivu que tapecieron nuna zona montiega asitiada detrás del Consorciu d'Agües de Bilbao.

   La nueche anterior al día señaláu, los etarres secuestraron al conductor d'una Citroën Jumpy y, tres amarralu a un árbol, cargaron l'esplosivu na furgoneta, que treslladaron a les puertes del edificiu Bami, onde s'alcuentra la sede de la televisión pública vasca.

   N'abandonando'l llugar a pie, Beobide avisó a les 9.55 hores al serviciu de Bomberos del Conceyu de Bilbao pa informar de la existencia d'una bomba nes instalaciones de la EiTB que diba esplotar nuna hora. Sobre les 11.05 hores prodúxose la esplosión, que causó daños valoraos en más de cinco millones d'euros na sede y de más de 22.000 nos vehículos aparcaos nel llugar.

   Por toos estos fechos, l'Audiencia Nacional atribuyía a Mardarás los delitos d'estragos terroristes (15 años de cárcel), detención illegal con finalidá terrorista (10 años), y dos robos con violencia con finalidá terrorista, unu d'ellos en grau de tentativa (trés años y mediu y un añu, respectivamente).    

   La condena basábase na declaración que Beobide emprestó tres la so detención, el descubrimientu de buelgues de l'acusada nun pisu que compartió col etarra na población francesa de Tours y d'un planu marcáu de Bilbao y Basauri que s'alcontró na casa de la so madre.

PRUEBES INSUFICIENTES

   Sicasí l'altu tribunal nun considera qu'estes pruebes seyan válides y asegura que nun la rellacionen nin cola colocación del artefactu esplosivu, nin col so confección de la bomba, nin col robu del vehículu, nin cola detención illegal d'una persona, llevada a cabu mientres l'acción terrorista.

   Los maxistraos aseguren que la sentencia de l'Audiencia Nacional basóse en "una intuición suxetiva" que nun cumple "les esixencies de la garantía constitucional de presunción d'inocencia". "Nun pue tenese por oxetiva nin compartise", añadió.

   En cuanto a la declaración de Beovide, la sentencia del Supremu apunta que la emprestó en sede policial pero nun pue tenese por válida, dao que'l compimpuáu nun la ratificó ante'l xuez. Tamién menta'l planu alcontráu pola policía y asegura que nun coincide con un croquis ellaboráu pol xefe del comandu pa marcar la colocación d'unos zulos.

   "Tovía almitiendo hipotétiques coincidencies, como que se refier a una mesma zona xeográfica, éstes nun tienen base abondo pa inferir que la condenada tuviera nel escenariu de los fechos que les grafíes pudieren representar", diz la resolución.