Unu de los pilotos del avión de Germanwings alcontrábase fuera de la cabina de mandu antes del accidente, nel que morrieron les 150 persones que viaxaben a bordu, tal como informa'l diariu estadounidense 'The New York Times' un oficial militar d'altu rangu implicáu na investigación.
La fonte consultada pol periódicu esplica que na primer parte del vuelu ente Barcelona a Dusseldorf escuchábase una conversación "bien nidia" ente los pilotos. Sicasí, l'audiu indica que de siguío "unu de los pilotos salió de la cabina y nun pudo volver entrar".
"Dende fuera taba golpiando na puerta y nun había una respuesta", añadió l'investigador, qu'indica cómo la intensidá de los golpes diba elevándose sin alcontrar respuesta. L'informador --en condición d'anonimatu, pues siguen les investigaciones-- diz desconocer la razón pola qu'unu de los pilotos abandonó la cabina.
"Lo que ta claro ye qu'a lo último del vuelu l'otru pilotu ta solu y nun s'abrió la puerta", acaba l'investigador, que con estos datos de voz facilitaos afonda nel misteriu qu'arrodia l'accidente, dao que nun apurre nenguna información sobre'l pilotu que se queda na cabina.
EMPIEZA LA EVACUACIÓN DE LOS CUERPOS
Los equipos de rescate empezaron la evacuación de los restos de les víctimes del avión de Germanwings que s'estrelló'l martes nos Alpes franceses, según informaron les fuerces esplegaes sobre'l terrén a FranceTVinfo y 'Le Figaro'.
"La evacuación n'helicópteru de los cuerpos de les víctimes empezó", confirmó un coronel de la Xendarmería al periódicu galu, sin entrar en más detalles.
Los investigadores atayaron el rastrexu de la zona dende les 18.30 hores pola falta de lluz. Como asocediera'l martes, cinco miembros del Pelotón de Xendarmería d'Altu Monte tomaron el relevu p'asegurar l'área.
Cientos d'efectivos tán esplegaos na zona del accidente pa recuperar los restos de l'aeronave y de les 150 persones que viaxaben a bordu. Los equipos de busca alcontraron yá una de los dos caxes negres, la que contién el rexistru de conversaciones en cabina.
