Ensin munchos conocimientos de tonada asturiana, un oyente poco avezáu pue entender que tolo que se canta pertenez al mesmu estilu. Ye más, pue entender que la tonada asturiana tien un únicu estilu y que dientro d’ella nun se diferencien, como nel flamencu, palos estremaos.

La meyor manera de facese colos estremaos estilos d’un xéneru como la tonada asturiana ye sentilos. Y, pa ello, puen sirvir d’exemplu estes 10 tonaes. Añado xunto a elles el nome d’un cantador, pero ye más que nada por dicir el nome del que tomo la referencia.

Estes puen ser, entós, 10 tonaes pa dar los primeros pasos dientro de la tonada; comentando, de mano, que cada una d’elles pertenez a ún de los 10 estilos más clásicos del xéneru.

1 “Tengo de subir al puertu”, Juanín de Mieres.

2 “Tengo de dir al molín”, Juanín de Mieres.

3 “Baxaron cuatro ayeranos”, Juanín de Mieres.

4 “Amagostasti castañes”, Juanín de Mieres.

5 “Carretera de Cualloto”, Obdulia Álvarez, La Busdonga.

6 “La praviana”, José Martínez, Botón.

7 “La cabraliega”, Dimantina Rodríguez

8 “A la salida del Sella”, Juanín de Mieres.

9 “La portillera”, Juanín de Mieres.

10 “A la Pipiona”, Juanín de Mieres.

Nota: de manera popular, confúndese’l términu “estilu” con “melodía”; de manera qu’hai xente que diz que la tonada asturiana tien más de doscientos estilos: lo que ta queriendo dicir ye que conoz más de doscientes tonaes diferentes –o, lo que ye lo mesmo, más de doscientes melodíes diferentes de tonada.

Falar con propiedá d’estilos, na tonada asturiana, ye falar de soberanes, de braves o d’arrieres. De cada ún d’espos estilos si hai más de doscientes melodíes diferentes.

Por eso, ye bonu esti exerciciu el de sentir eses 10 tonaes de 10 estilos estremaos. La preponderancia de Juanín de Mieres ye, cenciellamente, porque ye’l que más a mano tengo según toi escribiendo esti artículu.