El secretariu d'Organización del PSOE, César Luena, aseguró esti llunes que nun va haber nengún acuerdu sobre rexeneración democrática col PP porque ye "imposible" pactar "col partíu de la corrupción", pero aseguró que los socialistes van caltener conversaciones con tolos grupos parlamentarios, incluyendo'l 'popular', pa poder "avanzar" na llucha "contra esti cáncer de la sociedá".

   Nuna rueda prensa tres la xunta de la Comisión Permanente de la Executiva Federal del PSOE, Luena insistió en que "nin hubo, nin hai, nin va haber acuerdos o pactos col PP" y anunció que'l PSOE va presentar nel Congresu de los Diputaos la so propia propuesta de llei, con midíes pa combatir la corrupción y va facer enmiendes a los testos que presenten otros grupos, que nun cree que sían tan "ambiciosos" como los suyos.

   D'esta manera, los socialistes marquen un puntu d'inflexón nes conversaciones col PP qu'entamaren al empezar esti periodu de sesiones coles mires d'aprobar un paquete de midíes sobre rexeneración democrática y que'l PSOE defendía pola necesidá d'avanzar nesta llucha.

"FALAR" NUN YE PACTAR

   Esti llunes, Luena refugó cualquier acuerdu y anunció que'l PSOE va tener la so propia iniciativa, a la que va convidar a sumase al restu de partíos, ente ellos el PP, pa lo que sí va haber diálogu. Una cosa ye, dixo, el refugu al pactu y otra "falar y tener conversaciones". "El PSOE fala con tolos grupos, faltaría más que nun vaya a falar col grupu parlamentariu", dixo.

   Lo que nun va haber, calcó, ye "un pactu" pa que los 'populares' puean "tapecer les sos vergüences". Ello ye que preguntáu en repitíes ocasiones pol motivu pol que decidieron esta estratexa, el dirixente socialista defendió que lo que cambió ye l'usu "chambón" que consideren que fizo'l PP d'estes conversaciones nel ámbitu parlamentariu, dempués de los escándalos qu'afecten a los exministros Rodrigo Rato y Ángel Acebes, buscando "facer propaganda" d'un pactu que "nun hubo nin va haber", coles mires de "tapecer les sos vergüences".

   "Eso ye lo que cambió, vióse-yos el plumeru: quisieron tresformar conversaciones parlamentaries nun olvidu y perdón", insistió Luena, qu'avisó al PP de que "nun pues pretender escondese" detrás d'esti diálogu.

   Luena insistió amás en que'l PP ye "el partíu de la corrupción", como demuestra que les investigaciones xudiciales falen de 20 años de financiación irregular que los socialistes creen que conocía'l presidente del Gobiernu, Mariano Rajoy. Por ello, consideren que ye "imposible" pactar con esti partíu: "pactar col PP contra la corrupción ye una contradicción de términos, ye un oximoron", remachó.