Ediciones Saltadera presenta una nueva colección de publicaciones n’asturianu, que sumar a la revista asturiana de cultura, Campo de los Patos, que vien publicando dende 2010 (4 númberos).
Si a finales de 2013 editaba la poesía completa de K. P. Kavafis (“Los 154 poemes”, con traducción y estudiu de Xosé Gago), agora acaba de sacar “Les manes enceses” (Antoloxía 1948-2001), una obra que repasa llibru a llibru tola poesía d’Eugénio de Andrade, el poeta portugués más importante de la segunda mitá del sieglu XX, a l’altura de Fernando Pessoa. Andrade tuvo una especial vinculación con Asturies, llegando a participar nuna Selmana de les Lletres Asturianes. La selección, traducción y prólogu son d’Antón García.
En breve Saltadera va publicar un nuevu llibru: “Más espeso que l’agua”, los relatos que Consuelo Vega Díaz foi perfaciendo a lo llargo d’estos últimos años.
Per otra parte, sigue nes llibreríes asturianes hasta agotar existencies una ufierta única y limitada: por 9,90 € pue consiguise la obra Cartografía histórica de Asturias, de Luis Sevilla, un llibru en tapa dura y gran formato (31 x 31 cm, 360 páxines) que repasa a través de más 100 mapes a color la representación espacial d’Asturies, dende una interpretación cásique mítica (el ríu Astyr, presente en munchos mapes, nun esiste) al rigor científicu de les representaciondes del sieglu XX.
