Cola obra de Yasmina Reza, “A un dios salvaje”, se inaugura la Seronda de Teatru nel Auditoriu Teodoro Cuesta de Mieres, que llega a la so 26ª edición. Al cargu del grupu Teatru Contraste, esti vienres 3 d’ochobre.
Tres son les programaciones teatrales que tienen llugar en Mieres, la Primavera de Teatru y el Teatru de San Xuan. Dende va unes ediciones, la Primavera de Teatru especialízase n’atender al públicu infantil, realizando un fondu trabayu de difusión al traviés de los colexos, institutos y guarderíes. Na edición d’esti añu programóse una obra de teatru pa bebés.
Nel Teatru de San Xuan avérense bien d’obres del circuitu nacional y formen parte de la programación cultural dientro de les fiestes. Nesti pasáu mes de xunu, la programación de San Xuan colgó de la taquilla el lletreru de “nun hai entraes” en cinco funciones.
Polo xeneral, la programación teatral ocupa tolos vienres d’ochobre, payares y avientu. Pero, nesta edición, tres obres van representase nel Atenéu de Turón, dos más en sábadu nel citáu Auditoriu y otra más en xueves.
Esta programación teatral compleméntase cola ufierta de cursos de teatru, dalgo que cumple nesta edición 25 años faciéndose y que consiguió que na Casa de Cultura Teodoro Cuesta dieran los sos primeros pasos actrices como Eliana Sánchez (de la serie “Águila Roja”) o María Cotiello (de la película “Las trece rosas”), o actores como el popularísimo Alberto Fernández (al frente de “Folixa en Folixa” y “Superasturianos”, en TPA).
Pal vienres 10 d’ochobre la segunda obra del ciclu va ser la comedia “Tu, yo y el vecín de Mieres”, al cargu de Teatru El Carbayín. A la que siguirán en cartelera “Que viene los otros”, de Traslluz Teatru, “El gallu vengador”, de la Compañía La Cruz de Ciares, y “Toc toc”, de Maliayo Teatru.
