Les muyeres son más vulnerables a los efectos del cambéu climáticu, según aseguró la directora executiva del organismu de Naciones Xuníes dedicáu a la igualdá de xéneru, Phumzile Mlambo-Ngcuka, que manifestó que les muyeres "tán na primer llinia y lleven lo peor" del calentamientu global.
La representante fixo tal afirmación esti martes na cume sobre cambéu climáticu celebrada en Nueva York na que la presidenta de Chile, Michelle Bachelet, manifestó que cambéu climáticu ya igualdá de xéneru son dos cuestiones que tán "inexorablemente xuníes".
"Este ye un alderique crucial porque sabemos que los que tán nuna situación de desigualdá enfrenten más riesgu", dixo la mandataria chilena, que foi directora executiva de ONU Muyeres en 2010.
La presidenta sorrayó que muyeres y neños son 14 vegaes más vulnerables que los homes en casos de desastres naturales rellacionaos col cambéu climáticu, como les inundaciones y les seques.
Amás, añadió qu'estes sufren tamién los efectos negativos del cambéu climáticu na agricultura, un sector nel que representen el 43 por cientu de la fuerza llaboral mundial y el 65 por cientu de los emplegaos na cría de ganáu.
Por ello, Bachelet manifestó que ye necesaria una mayor presencia de les muyeres nos órganos de decisión y que "tienen de tar presentes nel poder políticu".
