L'importe total de les ayudes pa la promoción y normalización del asturianu nel presente añu 2014 ye de 232.513,40 euros

Uviéu.-La Conseyería de Cultura ta acabante publicar nel Boletín Oficial del Principáu d'Asturies (BOPA) la convocatoria y bases que rixen les distintes llinies de subvención pa la normalización social del asturianu y del gallego-asturianu nesti 2014. L'importe total de les ayudes xube a 232.513,40 euros, que se distribuyen nes llinies siguientes:

Promoción del llibru n'asturianu y en gallego-asturianu

Esta convocatoria tien como finalidá la d'ampliar el círculu de llectores y l'ámbitu de divulgación de la lliteratura asturiana. La dotación ye de 81.513,40 euros y van poder optar a les ayudes aquelles editoriales que presenten proyectos de llibros orixinales o traducíos d'otres llingües y que pol so interés y calidá contribuyan a la normalización social de la llingua y al arriquecimientu de la cultura asturiana.

Promoción de la música n'asturianu y en gallego-asturianu

L'oxetu d'esta llinia d'actuación ye la concesión d'ayudes económiques a empreses privaes pa la promoción de la música n'asturianu y en gallego-asturianu, que se realice en diversos soportes físicos o dixitales, poniendo en valor d'esta manera'l pesu de les iniciatives culturales nel ámbitu musical como elementu normalizador. Dotación de la convocatoria: 24.000 euros.

Actividaes de medios de comunicación pa la normalización social del asturianu y del gallego-asturianu

L'oxetu d'esta llinia d'actuación ye la concesión d'ayudes económiques a empreses periodístiques, radiofóniques, televisives o d'internet, poles inversiones realizaes na producción d'espacios onde s'utilice l'asturianu o'l gallego-asturianu, bien de manera habitual n'informaciones xenerales, bien n'espacios periódicos y fixos, bien en programes estraordinarios d'interés especial, pero siempres que tal empléu contribuya a la normalización y dignificación del usu social de la llingua y sían espacios configuraos como propios del mediu de comunicación y asumíos por él. Dotación de la convocatoria: 127.000 euros.