La casa más aisllada y misteriosa d’Albania, residencia del dictador comunista Enver Hoxha, abrióse pela primer vez al públicu por mor d’un grupu d’artistes que la convirtieronper una nueche nuna sala d’arte contemporaneu.

La villa na que’l dictador viviera cola muyer y los tres fíos afáyase nel corazón de Tirana, onde tan concentraos los cafés y restoranes más lluxosos de la capital, el barriu convertíu agora nel centru del ambiente de la xuventú albanesa. Pero, a lo llargo de la dómina comunista (1944-1991), esti barriu yera’l más silenciosu y llamábase’l bloque de los dirixentes, yá que nél vivíen unes 15 families de la élite política. Soldaos armaos vixilaben el bloque y montaran nes cais d’accesu puestos de control pa vedar la entrada a la xente común.

Albania fuera l’últimu país n’abandonar el comunismu en 1991 y nos años posteriores de la democracia l’antigua casa del dictador albanés, muertu en 1885, sirvió p’agospiar delles visites oficiales, fundamentalmente delegaciones de Kosovo.

Agora, pela primer vez, el ciudadanu d’a pie tuvo la posibilidá de ver la cama matrimonial d’Hoxha, la so biblioteca –atacada de lliteratura francesa-, el cuartu bañu, sofás, cuadros de realismu socialista y otros obxetos de la casa.

La exposición d’ocho artistes albaneses combina la idea de visita guiada per una casa-muséu cola exhibición d’instalaciones y videos, como forma mui particular de vincular el pasáu y la memoria col presente y el futuru. L’eventu artísticu cellebróse baxo un fondu de música xina y soviética de les décades del 60 y 70, extraida del archivu de Radiu Tirana, pa recordar l’amistá albano-soviética-xina d’aquelles dómines.