Los violines que va más de tres sieglos manufacturó’l luthier de Cremona Antoniu Stradivari son lleendarios y cotícense en millones de dólares pero, a ciegues y guiaos pol oyíu, los músicos d’agora prefieren los instrumentos modernos.

Asina, nel xunu que vien la casa Sotheby’s va subastar un instrumentu salíu en 1719 de les manes de Stradivari, la nomada viola McDonald y el preciu de partida ye de 45 millones de dólares.

Stradivari ficiera ente mil y mil cien instrumentos, incluyíos violines, cellos, arpes, violines y violes, de los que sobreviven unos 650, ente ellos ente 450 y 512 violines.

Los stradivarius fueron motivu de noveles, películes, robos y búsquedes y, más recientemente, d’un debate alredor de qué yera la causa misteriosa de la so “voz” peculiar, la so comparación colos violines d’anguañu y, agora mesmo, d’una investigación científica.

Claudia Fritz, una investigadora del soníu na Universidá de la Sorbona de París, modificó un experimentu que yá realizara dos años enantes, respondiendo a les crítiques y en septiembre pasáu punxo a diez solistes d’estremaos países delasntre d’una docena de violines.

El resultáu de la investigación publicóse esta selmana na revista Proceedings of the National Academy of Sciences.

L’experimentu involucró seis instrumentos italianos antiguos, d’ellos cinco stradivarius y seis instrumentos de factura modernas y dividióse en tres partes. Na primera los diez solistes evaluaron los doce violines nuna pequeña sala d’ensayos; depués los mesmos violinistes evaluaron los doce violines nun auditoriu mayor con bona calidá acústica y la posibilidá d’acompañamientu de piano.

Na última parte del experimentu los solistes usaron los instrumentos con acompañamientu d’orquesta na Coeur de Ville delantre d’una audiencia de cincuenta persones conformada por luthiers, músicos, melómanos y críticos musicales.

Tolos violines allugáronse riba una mesa y los solistes tuvieron llibertá d’escoyer al que, hipotéticamente, podría reemplazar al so propiu instrumentu durante una xira. Tuvieron 50 minutos pa prebar tolos violines que quixeren, usando los sos propios arcos y asina escoyeron los cuatro consideraos meyores.

Dos violines de fabricación reciente fueron los qu’algamaron mayores puntuaciones en tol grupu y un vieyu stradivarius quedó en tercer llugar. En xunto, los violines nuevos recibieron 35 puntos a favor y los vieyos cuatro.