Esti sábadu 22 de febreru, a partir de les 20:15h. nel Nuevu Teatru de Llangréu va tener llugar la estrena de la nueva comedia del grupu Teatru Padre Coll, “El cantar de los pipiolos”.

La obra orixinal, del llangreanu Pedro Mario Herrero, “La balada de los tres inocentes”, fuera estrenada nos teatros madrileños nos años sesenta con un enorme éxitu, pesie a que la censura se cebara cola obra, hasta l’extremu de que l’autor tuvo que cambiar a los personaxes de guardies civiles y convertilos en carabineros italianos.

Va una docena d’años, tovía en vida de Pablo Mario Herrero, el collaborador d’Asturias Mundial Ismael González Arias fizo una adaptación de la obra al asturiano, regresando a los sos oríxenes: los protagonistes volvíen a ser guardies civiles y l’accidón diba trescurrir nes cuenques mineres asturianes. La obra estrenóla naquel tiempu’l grupu de teatru N’Alpargates y Orbayando, pero Pablo Mario Herrero nun pudo llegar a vela.

L’argumentu fala de cómo los poderes fácticos d’un pueblu de Les Cuenques tan revolucionaos pola visita del obispu. Al cura del pueblu, Lino, empiecen a reconocése-y los méritos. Vitorino, capitán de la Guardia Civil, ta esperando un ascensu. L’alcaldesa ve na visita un momentu preciosu pa soltar ún de los sos grandes discursos. La madre del cura ta superada pol asuntu. La hermana del cura ye una beata… Y, d’esmenu, Xandru, el númberu de la Guardia Civil del pueblu, desaparez. Y, agora, ¿qué facemos?

Baxo la dirección de Juan José Navarrete y música orixinal de Pablo Carrera, la nueva obra de Teatru Padre Coll apunta maneres pa ser una de les grandes sorpreses de la comedia asturiana d’esta temporada.