Un total de 63 proyectos van ponese a disposición de los centros qu’imparten Asturianu o Gallego-Asturianu
La Conseyería d’Educación, Cultura y Deporte, al traviés de la so Dirección Xeneral de Política Llingüística, pon en marcha l’Axenda Didáctica Escolar pa esti cursu 2013-2014. La iniciativa, que llega a la quinta edición, busca sofitar el trabayu de los docentes de les asignatures d’Asturianu y de Gallego-Asturianu y amosar a la comunidá educativa les esperiencies nel mundu de la cultura (música, lliteratura, teatru) que se vienen faciendo nestes llingües.
L’Axenda Didáctica Escolar 2013-2014 ufiértase a tolos centros educativos del Principáu onde se dea l’asignatura de Llingua Asturiana o Gallego-Asturiano, públicos o concertaos, d’Educación Primaria, Secundaria o Bachilleratu. El plazu pa solicitar les actividaes acaba’l 15 de febreru.
Nesta quinta edición inclúyense un total de 63 actividaes: 37 pa los centros d’Educación Primaria y 26 pa los de Secundaria y Bachilleratu.
Dieciséis actividaes pensáronse p’ayudar a que l’alumnáu de Primaria, Secundaria y Bachilleratu s’avere al panorama musical de la mano de músicos, asociaciones y empreses vinculaes con esta estaya creativa, como L’Alma de la Melodía, Xulio Arbesú, Anabel Santiago, Sara Cangas, Héctor Braga, Michael Lee Wolfe, Mari Paz González, Xuacu Amieva, Paula Amieva, Xune Elipe, Sergio Rodríguez, Diego Pangua, Xosé Antón “Ambás”, Lisardo Prieto, Les Pandereteres de Fitoria y Misiva.
Dieciséis talleres van tratar asuntos como la lliteratura, los xuegos, el cine, el mercáu discográficu, la bioloxía y los bailles y la indumentaria tradicional. Van tar dirixíos por asociaciones y empreses como’l Grupu Cultural San Félix (Xurde Fernández, Marián García, Alejandra Fernández), Trebeyos y El Santo Milagro (Pablo Quiroga, Pablo de María, Alfredo González).
Les actividaes de cuentacuentos y monólogos van centrase en seis actividaes a cargu de Carlos Alba “Cellero” y de Factótum Teatro.
Complementen la programación de l’Axenda Didáctica 2013-2014 el teatru y los títeres, con ventitrés actividaes y la participación de Producciones Nun Tris, Higiénico Papel, Factótum Teatro, Mar Rojo Producciones, Factoría Norte, Quiquilimón, Carlos Alba “Cellero”, Asociación pola Recuperación de los Sidros y les Comedies, Tragaluz Títeres, Yheppa Títeres, amás de la ópera bufa Bastián y Bastiana, de Mozart, dirixida por Producciones Nun Tris.
L’Axenda Didáctica Escolar ye una iniciativa de la Conseyería d’Educación, Cultura y Deporte del Principáu d’Asturies que val como actividá complementaria, averando la llingua asturiana y el gallego-asturiano a otros ámbitos de tipu cultural y artísticu.
