Esti ye al menos el vaticiniu que dellos visionarios avienten estos díes nel Mercáu Internacional del Discu: les descargues musicales tienen los díes contaos, igual que too aquel que se niegue a abrazar la escucha en llinia o “Streaming”. Esti vaticiniu nagua por anticipar como va ser esta industria en 10 años.

Marc Geiger, responsable musical y dixital d’una de les axencies artístiques más importantes del mundu, WME, con xente como Lady Gaga o Adele na so cartera de cleintes, ve’l futuru como una industria de xigantes, na que van mandar aquelles plataformes que superen los 500 millones de clientes.

El cambiu parez va suceder más aína de lo qu’aparenta. Según datos de Nielsen Soundscan, que contabiliza les ventes en Norteamérica, hacia la tercera selmana de xineru’l mercáu de descargues estadounidense perdiera cásique un 12 per cientu nel casu de les canciones y más d’un 13 per cientu nel de los álbumes, en comparación col mesmu periodu del añu anterior.

N’opinión del directivu de WME, los archivos musicales son una molestia. Nun ye l’únicu qu’opina que’l futuru de la industria pasa por suscripciones de pagu que, por un coste mediu de 10 € al mes, menos de los que cuesta un álbum d’actualidá baxáu d’iTunes, proveen al usuariu d’un catálogu inxente de música, más de la que podríen consumir y ensin merma pa la memoria de los sos dispositivos.