Metanes de la llarga polémica ente la empresa española Sacyr y el gobiernu panameñu sobre’l desarrollu de les obres d’ampliación de la canal de Panamá, el gobiernu nicaragüense y la firma concesionaria de la canal interoceánica de Nicaraguia anunciaron güei que la construcción de les obres entamará n’avientu d’esti mesmu añu.

La noticia diose nuna escueta nota de prensa, firmada pol presidente de Nicaragua, Daniel Ortega, y el propietariu de la firma Wang Jing, d’orixen xinu. El proxectu nicaragüense pretende construyir una canal interoceánica más amplia que la de Panamá, con un costu de 40 mil millones de dólares, según estimaciones oficiales. Esta canal xuniría los océanos Pacíficu y Atlánticu, taría acompañáu d’un oleoductu y una ruta seca, dos puertos d’agües fondes, dos aeropuertos y dos zones franques, d’alcuerdo colo espresao poles autoridaes nicaragüenses.

El gobiernu de Nicaragua clacula que, d’entamar la construcción nel 2014, el crecimientu económicu del país yá nun sería del 4% al 5%, según les estimaciones actuales, sino del 10,8% esti añu y uparíase al 15% en 2015.

La construcción de la canal de Nicaragua fue alcordada en xunu pasáu ente’l gobiernu nicaragüense y HKND Group, que tamién obtuvo la concesión de la vía por 50 años, más otros 50 prorrogables. Partíos políticos d’oposición, organizaciones non gubernamentales, defensores de derechos humanos, empresarios, abogaos, ecoloxistes y personaxes prominentes, recurrieron por inconstitucionalidá’l proxectu, pero la Corte Suprema de Xusticia rechazó n’avientu pasáu los 32 recursos presentaos. Según les previsiones, la canal nicaragüense tendría de tar parcialmente finada en 2019.