El pianista polacu Wojciech Kilar, que compunxo música clásica y los temes de películes como “El pianista”, de Roman Polanski, y “Bram Stoker’s Dracula”, de Francis Ford Coppola, morrió esti domingu a los 81 años d’edá na so casa de Katowice, nel sur de Polonia, depués d’una llarga enfermedá.

Kilar fuera un home modestu qu’avezaba evitar l’atención pública. Dedicó la so vida a la composición de sinfoníes y conciertos, lo que siempre punxo per delantre de la producción musical de películes, pa les qu’escribió bien de temes musicales y bandes sonores. La so inspiración provenía de la música folclórica polaca y de les oraciones ya himnos relixosos qu’aprendiera en llatín de la que fue molacín.

Sicasí, fue la música pa películes, n’especial pa la cinta de Coppola de 1992, la que punxo a esti compositor prolíficu de vanguardia ante l’atención del mundu. El so trabayu tamién interesó a otros cineastes de sonadía, como Jane Campion, que-y encargó la banda sonora de “Portrait of a Lady”.

Kilar declaró en dalguna ocasión que’l criteriu d’él pa componer el tema musical d’una película sofitábase en tres factores, que mencionó nesti orden: el nome del director, la paga y el guión. Kilar recordó tener pregumntao a Coppola en Los Ángeles sobre’l tipu de música que deseaba pa la so película. El cineasta respondió-y: “Yo yá fice la parte mía. Usté ye’l compositor. Faga lo que-y pete”.