A lo llargo de los años noventa y primera década del presente sieglu una llarga rede de senderos texóse n’Asturies. Toes elles rutes homologaes según los criterios de les federaciones montañeres y senderistes, qu’acabó convirtiendo a Asturies nún de los destinos con más grande númberu d’elles.

Agora, la Federación de Deportes de Montaña, Escalada y Senderismu del Principáu d’Asturiespropón destacatalogar más de mediu centenar d’estes rutes, por mor del abandonu nel que les tienen les alministraciones encargaes del so mantenimientu. Dalgo que pue comprobase visitando dalguna de les más reputaes nel so momentu, como la Vuelta al Valle del Güerna, tomanda dafechamente pola maleza y de difícil siguimientu en bona parte de los traxectos.

La crítica a la situación de los caminos señalizaos nel Principáu d’Asturies vien dándose dende va años nes páxines webs de montañeros y senderistes. Mesmamente, dellos caminos que formen parte de los caminos de Santiago, amás de mal señalizaos, tan tomaos pola yerba, cerraos poles sebes y en completu abandonu.

De toles formes, la crítica nestes páxines non sólo llega a les alministraciones sinon tamién a la propia Federación de Montaña pol abusu que se dio nel so momentu na proliferación d’estes rutes y senderos, ensin que s’atendiera a la necesidá d’ellos o a lo ficticio de munches de les rutes trazaes. Tolos ayuntamientos quixeron tener nel so momentu pequeñes y grandes rutes y la Federación y les alministraciones nun apararon durante un tiempu d’inaugurales, comprobándose en bien de casos que yeren rutes ensin nengún interés y, más que nada, que nun se correspondíen con nenguna ruta hestórica sinon cola rede natural de caminos que, amestándose ún a otru, diben entetexendo pequeños y grandes recorríos con ciertu interés deportivu pero escasu interés cultural.

Conceyos como’l de L.lena sedría de los más perxudicaos a la hora d’esta descatalogación. Nel catálogu propuestu pola Fempa, L.lena perdería nada menos que 23 senderos.