La Orquesta de Cámara de Siero ye la nueva ganadora del Premiu Serondaya a la Innovación Cultural na categoría de les Artes, concedíu por un xuráu integráu pol arquitectu Jorge Maojo, en funciones de presidente del xuráu, l’escultor Llonguera, el cantante Víctor Manuel, el productor audiovisual Juan Gona, l’escritor Fulgencio Argüelles, el periodista y director del diariu El Comercio Íñigo Noriega y l’actor Andrés Presumido. El Premiu fio creáu y ta patrocináu pola Asociación Cultural Serondaya de Cenera, organizadora d’un ampliu programa d’actividaes de llarga repercusión nes cuenques mineres asturianes y n’Asturies en xeneral.
El xuráu tuvo d’escoyer ente seis candidatures, que fueron, amás de la premiada, la del Coro El León de Oro, el Teatru Xovellanos de Xixón, la Noche Blanca de Xixón, el Festival de Cine de Xixón y l’arquitectu gallegu Javier Pena. Nel acta de concesión recoyóse que se premiaba a la OCAS pol so carácter innovador y solidariu, un trabayu que vienen desarrollando dende va 12 años y que se conoz baxo’l nome de Vínculos.
Considérase innovador el trabayu d’esta orquesta nel sentíu de que, dende la so creación, nun paró de crear y collaborar con nueves propuestes, ellaborando proyectos nos que s’implica a los xóvenes músicos que la componen en tolos aspectos, dende la organización hasta la producción, y que lleva’l so esfuerzu a dar lo meyor d’ellos mesmos collaborando con países y collectivos desfavorecíos. Un esfuerzu que sirve, igualmente, pa formar a los sos músicos y p’abrir los sos horizontes, y too ello nunos tiempos onde la crisis ta llevando a desaparecer formaciones d’estes característiques en diferentes países europeos. De manera que, coles sos idees y el so trabayu, nun paren d’amosar qu’otra forma de facer música ye posible.
Dende 2005 la OCAS realiza un reconocíu proxectu de cooperación educativa, social y cultural que lleva’l nome de Vínculos, que tien la música como elementu fundamental, y que llevó a tolos integrantes de la orquesta a países como Bolivia, Brasil, Hondures, Guatemala, Marruecos o Grecia, dellos en varies ocasiones.
Recibirá’l premiu’l so director, Manuel Paz, nun actu oficial que va tener llugar na Casa de Cultura Teodoro Cuesta de Mieres del Camín, el 27 d’avientu d’esti mesmu añu.
