Una parede afuracada a balazos. Ye lo que queda ne lllugar nel que fueron fusilaos Nicolae Ceaucescu y la muyer d’él, Elena, el 25 d’avientu de 1989. Agora mesmo, la nueva atracción turística del país balcánicu. Dos miembros del pelótón d’execución faen de guíes y relaten el fechu.

Depués que s’abrieran al públicu la so casa natal y delles de les sos lluxoses villes espardíes per Rumanía, los curiosos puen averar agora al llugar onde morrió’l dictador, nun patiu del antiguu cuartel militar de Targoviste, asitiáu a unos 80 km al noroeste de Bucarest, tresformáu agora nun muséu. Tamién pue vese ellí meso la sala onde’l matrimoniu Ceaucescu vivió los últimos díes. Puen contemplase los muebles y obxetos de la época, como’l teléfonu, la televisión y les típiques figures de decoración que cásique toles families rumanes caltienen nes sos cases.

Los visitantes van poder contemplar a partir d’agora la parede qu’inda conserva los furacos de los balazos colos que morrieron el dictador y la muyer depués d’un percorríu de venti minutos poles sales del complexu militar. El preciu de la entrada ye 7 leis (1,5 euros).

El muséu, que fuera una escuela del exércitu de caballería hasta 1947, cuando pasó a ser un centru militar, lleva recibíes cerca de dos mil visites nel so primer mes de funcionamientu. El Conducator –títulu oficial del dictador rumanu- y la so esposa fuxeran n’helicópteru de Bucarest tres díes enantes de la so execución. Venía de producise un llevantamientu popular qu’acabaría provocando la cayida del réximen dictatorial.