“A Rosalía, de Federico” ye un diálogu escénicu d’Amancio Prada con dos de les voces más esenciales y conmovedores de la poesía española: Federico García Lorca y Rosalía de Castro. “Llevo a Galcia nel corazón porque nella tengo vivío y soñao abondo”, dixo un García Lorca almiráu del país de Rosalía, el que viaxara en 1932 y del qu’aprendió gallego, llingua na qu’escribió los sos “Seis poemas galegos”. Yá na so primer mocedá’l poeta evocara, nuna doliente salutación elexíaca a la so “hermana en tristeza”, la poeta de Padrón, aquella presencia de desafiante fondura que lu diba acompañar el restu la vida.

Sobre una indea orixinal de José Luis Gómez, Amancio Prada reconstrúi lluminosamente les güelgues que pelos caminos ensin tiempu de la poesía conducen al reencuentru colo ausente, la presencia de tolo que vincula a la tierra y les persones cola memoria de los sos suaños. Ye’l facese cargu del destín de los otros, l’alianza colos homildes entendida como una guapa opción de tar nel mundu, lo qu’otorga una asombrosa vixencia al mandatu de les sos palabres.

Nesti recital organizáu por Norte Sur Records (www.nortesurrecords.com), Amancio Prada aborda compisiciones inédites hasta güei nel so repertoriu: la figura simbólica de Federico y Rosalía, otra vuelta en viva voz, delantre del paisaxe críticu d’una más que común conciencia. El conciertu va tener llugar el 25 d’ochobre nel Teatru Filarmónica d’Uviéu.