Les muyeres saudís van siguir ensin tener derechu a obtener el permisu pa conducir, depués de que’l Conseyu Consultivu o “Shura” d’Arabia Saudí (Parlamentu designáu pol rei) desestimara esti xueves la propuesta d’una de les sos integrantes. El portavoz de la instancia, Mohamed al Mahana, aseguró que la iniciativa nun fue treslladada a la comisión de tresporte, porque nun formaba parte del orden del día nin ye competencia del Ministeriu de Tresporte.

Según informó l’axencia oficial SPA, la idea presentárala Latifa al Shaalan, una de les 30 muyeres qi’integren dende febreru pasáu la Shura, enantes namás formada por homes. El derechu de la muyer a conducir convirtióse nun tema polémicu nesti país ante les reivindicaciones de les activistes, les intervenciones de los clérigos pa vedalo y les midides de les autoridaes pa impidir que les muyeres conduzan.

Asina, el pasáu 5 d’ochobre, una saudí conduxo’l so coche peles casi de Riad, adelantándose d’esta forma a una protesta convocada pal 26 que vien pa defender esti derechu. Una campaña nes redes sociales insta a les saudís a salir a les casi esi día conduciendo los sos coches pa reivindicar los sos derechos.

Esta práctica fuera veada en 1990, cuando’l yá fallecíu muftí d’Arabia Saudí, el xeque Abdulaziz bin Baz, emitió un edicto relixosu que llevó al Ministeriu del Interior a imponer esta restricción. En septiembre de 2007, un grupu de muyeres intelectuales saudís creó la primer asociación nel reinu pa reivindicar el derechu a conducir.