Va años que’l yoga ye una de les actividaes preferíes n’Asturies pa facer actividá física, porque arriendes de los beneficios que tien sobre’l cuerpu, qu’inclúin más grande elasticidá, tonicidá muscular y meyor respiración, tamién sirve pa afayar l’equilibriu internu. La propia palabra, yoga, refier a la xuntura ente’l cuerpu y la mente.
La cuestión ye que non solo aumenta la cantidá de persones que se sumen a esta práctica sinon que surden variedaes y estilos nuevos, pa poder alcontrar el que meyor s’adapte a los gustos y necesidaes de la xente. Estes son les variantes más estendíes anguañu, dixebraes nos apartaos de práctiques tradicionales, tibetanes, de fuerza y movimientu, y calor:
TRADICIONALES
1 Hatha
Ye la forma más clásica de practicar los asanes y pranayames (formes de respiración). El Hatha combina la postura y la respiración p’aportar a un estáu de realización. Una clasde de Hatha consiste n’exercicios de precalentamientu, el saludu al sol, los 12 asanes, la respiración pranayama y la relaxación final que se llama savasana.
2 Kundalini
Ye una disciplina física, mental y espiritual qu’abarca postures, exercicios de respiración, repitición de mantres y meditación. Les clases apiencen con un cantu de mantres, la práctica de los asanes y kriyes, y finen con una relaxacón y meditación. Los kriyes son exercicios que se faen según l’estáu d’ánimu.
3 Iyengar
Encara’l trabayu postural respetando les exes corporales y observando la perfección de les postures. Demanda una fonda concentración. Les clases nun se planifiquen previamente, porque la clase planteala l’alumnu.
4 Swara Yoga
Ye un tipu de yoga que se concentra na respiración. Utiliza una serie de técniques que permiten l’ingresu d’oxíxenu y prana, que ye la enerxía del universu, al organismu. Utiliza nueve tipos de respuración y tien munchos beneficios físicos, como reducción del estrés y calma de l’ansiedá.
TIBETANES
5 Kum Nye
Técnica budista tibetana que se centra enforma nel trabayu interior. Altérnense exercicios de postures con meditación y técniques pa equilibrar. Al traviés de los exercicios trátase de lliberar la mente p’aprender a sentir ya interpretar la realidá esterna. Durante les clases nun se faen preguntes sinon que ye’l maestru el que la organiza.
6 Kaladanda
Consiste na mestura de técniques del yoga Jivamukti y tibetanes. Utiliza métodos que desarrollen la compasión y la sabiduría, que van facer por acelerar el procesu de tresformación del ser, d’un cuerpu y mente sofrientes a ún plenu y feliz.
DE FUERZA Y MOVIMIENTU
7 Ashtanga
Esta escuela intenta recuperar les odho rames tradicionales del yoga y pon énfasis nel vinyasa, un movimientu sincronizáu cola respiración, mediante un métodu progresivu de series de postures xuníes pol trabayu respiratoriu, pranayama. Esta práctica produz calor internu y abondante mugor, y ye una de les técniques de yoga más intenses.
8 Yoga Booty Ballet
Técnica que surde en Los Ángeles y ye una forma nueva de concibir el yoga, el baille y l’exercicu físicu. Ye un exerciciu nel que se trabaya el cuerpu y l’espíritu, entemeciendo’l yoga clásicu con técniques nueves. Les clase entamen con una meditación nel que se practiques tres tipos de respitación. La segunda parte consta d’un baille cardiovascular combináu con ballet y na tercera practíquense los asanes.
9 Acroyoga
Ye una mestura ente yoga, masaxe tailandés y acrobacia. Ye una práctica interpersonal na que los alumnos salen de la so propia concentración y comparten colos demás. Nun se pue facer acroyoga en soledá. Nes clases fálase de “kula”, qu’en sánscrito significa familia o grupu, y que se pue traducir como comunidá del corazón.
CALOR
10 Bikram Yoga
Ye un métodu ideáu pa trabayar tolos sistemes del cuerpu con técniques de yoga y calor. Si bien ye Hatha Yoga, lo novedoso ye que se practica nun salón calefaccionáu a 42º y una humedá ente’l 40 y 50%. Practíquense 26 postures con dos exercicios de respiración, que se realicen dos vueltes cada ún.
