- El xuráu destacó ´l valir didácticu del tratamientu dixital de les imáxenes
Javier Antonio Marinas García resultó ganador de la cuarta edición del Premiu de cómic en llingua asturiana “Alfonso Iglesias”, que concede la Conseyería d’Educación, Cultura y Deporte del Principáu.
El xuráu que concedió esti gallardón na sede de la Conseyería d’Educación, Cultura y Deporte baxo la presidencia de la Directora Xeneral de Política Llingüística, Ana María Fueyo Llaneza, y cola participación de los especialistes de cómic Isaac del Rivero, Ruma Barbero y José Antonio García Fernández. Actuó como secretaria María Antonia Pedregal Montes, Xefa del Serviciu de Política Llingüística.
Ente les obres presentaes, el xuráu decidió por unanimidá conceder el Premiu al testu tituláu Homes, al valorar que se trata d’una obra de gran valor didácticu que destaca pol tratamientu dixital de les imáxenes.
El testu presentóse baxo l’alcuñu de “El Rapiegu”. Abierta la plica, l’autor resultó ser Javier Antonio Marinas García.
Javier Antonio Marinas García ganó numberosos premios d'ilustración y cartelismu, ente ellos el Premiu Urriellu d'Ilustración convocáu pola Conseyería de Cultura, Deportes y Mocedá nes sos ediciones de 1991 y 1992 o el Primer Premiu d'Ilustración a nivel nacional concedíu pola Universidá Popular de Castuera (Badajoz) en 1995.
En 1997 publicó'l so primer llibru, Ballenes, una hestoria na Asturies del sieglu XVI, al que siguió en 2005 Domno -una novela gráfica hestórica centrada nes rebeliones de Gonzalo Peláez- y en 2011 Pedro Menéndez d'Avilés, otra novela gráfica que narra la fundación de la primer ciudá d'Estaos Xuníos, San Agustín de la Florida.
