Más de trescientos neños y neñes de diferentes centros educativos de Llangréu asistieron a un conciertu didácticu nel que pudieron esfrutar y conocer d’una manera más fonda los soníos ya instrumentos tradicionales asturianos. Escolinos y escolines de Llangréu guiaos pol músicu y etnomusicólogu Héctor Braga tuvieron la posibilidá de conocer de forma directa y entretenida los soníos característicos de la música asturiana. Too ello al traviés d’exemplos sonoros ya interpretaciones de xéneros tradicionales del país (asturianaes, cantares, romances, sones pa baille); interpretaciones nes que tamién disfrutaron coles ferramientes de la organoloxía popular (gaita, harpa, gaita rabil, bandurria, vigulín...). Un conciertu que comnsiguió averar a los escolinos y escolines al so patrimoniu cultural manteniendo encesa la memoria de la música asturiana de la mano d’ún de los meyores músicos d'Asturies. Esti conciertu ta dientro les actividaes pa neños y neñes qu’organiza l’Ayuntamientu de Llangréu y que van tener continuidá’l próximu 15 de febreru cola representación de la obra teatral Hamlet 34 de la compañía Tabasko Teatro.