Pueden optar a esti gallardón los cantares con lletra n'asturianu o gallego-asturianu que se comercializaren ente'l 1 de xineru y el 31 d'avientu del 2013, siempres que se trate d’obres musicales de creación orixinal
El vienres día 17 de xineru publicóse nel Boletín Oficial del Principáu d'Asturies (BOPA) la convocatoria del “Premiu al Meyor Cantar” en llingua asturiana o gallego-asturianu, un gallardón qu'algama yá la so octava edición y col que se pretende visibilizar el talentu de los ceadores musicales qu'usen la llingua asturiana o'l gallego-asturianu en composiciones que sían dafechu orixinales y nueves.
A esti gallardón pueden optar los cantares con lletra n'asturianu o gallego-asturianu que se comercializaren ente'l 1 de xineru y el 31 d'avientu del 2013, siempres que se trate d'obres musicales de creación orixinal tanto na lletra como na música. Queden escluyíes les pieces tradicionales yá esistentes, les versiones o adaptaciones d'obres de creación publicaes orixinalmente n'otra llingua, y los cantares que nun fueren editaos y grabaos por primer vez nel añu 2013.
Los intérpretes o grupos interesaos pueden solicitar la so participación hasta'l 30 de xineru. A partir d'esa fecha, un xuráu formáu por espertos en música y llingua asturiana va escoyer d'ente los presentaos a los cinco finalistes, que van actuar en directu na Gala d'Entrega del Premiu (el día 14 de marzu nel Teatru de Llaboral Ciudá de la Cultura).
El Gobiernu del Principáu d'Asturies instituyó esti Premiu nel añu 2007 cola mira de consolidar, arriquecer y prestixar la creación musical asturiana. Nes ediciones feches hasta'l momentu, fueron ganadores:
· 2007: Toli Morilla, por «Azul y gris».
· 2008: Herbamora, por «Nosh».
· 2009: Alfredo González, por «La nada y tu».
· 2010: Xera, por «Tierra».
· 2011: Skama la Rede, por «Condenáu».
· 2012: Asturiana Mining Company, por «Si nun conoces Val.louta».
· 2013: Taranus, por «Ensin ti».
