Nel momentu actual, la política atropa l'actualidá, y falar de los sos actores y de los sos desafueros, que ponen en peligru la integridá territorial, la convivencia y l'economía, conviértese nun asuntu d'interés públicu.

La fecha ye tamién afecha para comentar el murniu legáu que mos dexaron los constituyentes que, col so enfotu desatamañáu por llograr el mayor consensu, fixeron chisgos a los nacionalistes que güei tamos pagando bien caros. Polo tanto, pocu de celebraciones y enforma de ponte.

Pero hai vida al marxe de la política y nun quiero arrenunciar a falar otra vegada d’una tema que considero de gran interés pa Uviéu.Al equipu de gobiernu de la nuesa querida ciudá, al que critiqué al entamu del mandatu por xubise los sueldos enantes de ver l'algame de les obligaciones a les que s'enfrentaba, tengo de reconoce-y agora actuaciones meritories ya intelixentes nel plantegamientu de los problemes que mos aquexen y les sos posibles soluciones.

Paralelamente, cuando la ponencia que desenvolví'l pasáu sábadu na Parroquia Rural de Santianes de Molenes del Rei Silu sobro'l Derechu Consuetudinario Asturianu -a la qu'asistieron, xunto a los vecinos del pueblu, xente nuevo-, pudi comprobar el desconocimientu qu'esiste de les nueses costumes, del nuesu “derechu rural”, de les nueses construcciones populares asturianes más emblemátiques.La coincidencia de dambes circunstancies anímame a resucitar un proyeutu que yá presenté énte les autoridaes municipales va unos años y que nun foi consideráu según dicíen por razones presupuestaries.

Trataríase d'aprovechar la orografía del Parque d'Iviernu y allugar nel incomparable marcu qu'ufierta, un elencu de les más totémiques construcciones populares asturianes, creando un percorríu etnográficu que, partiendo del Palaciu de los Neños, finara n’actual Casona, na que se proxectaría un curtiu de pequena duración sobro la hestoria d'Asturies y dalguna de les figures que conformen el Derechu Consuetudinario Asturianu direutamente rellacionaes coles construcciones que decidiera instalar.

Como puntu de partida, suxérese crear cinco ambientes: la casa, el pueblu, el ríu, el monte y la braña.En redol a la casa, que tomaría como referencia la Casona esistente, articularíase'l telar, la corte, la «antoxana», la «eira», el «llagar», el «rabil», el palombar, el «corripu pa los gochos», la casa’l fornu» y el «tendeyón».Nun espaciu próximu a la casa, el pueblu acoyería la capiya, el caleru, el «abeirigo», el váter, y el «potru pa ferrar».Nel ríu, qu'aprovecharía'l calce del regatu actual, allugaríase'l molín.Nel monte allugaríase'l «cortín» y el “corru castañes”.A lo cabreo, na braña, que s'asitiaría nos terrenes que llinden cola autovía, diríe los «teitos», corros, cabanes, «corru-vellal» y «ol.leres».

El Muséu propuestu non solo cumpliría pa cola función de favorecer que tolos asturianos que visitaren la ciudá tuvieren oportunidá de conocer les nueses construcciones y costumes sinón que sirviría como marcu afayadizu pa celebrar los tradicionales mercaos ástures que se desenvolveríen asina nun ambiente que-yos ye más propiu y más arraigonáu na so hestoria, dexando al visitante remembrar na so esencia l'ambiente rural tradicional.

Cada productor, ocuparía'l llugar que-y correspuende na construcción de referencia. Asina, les filanderes asitiaríensd nel telar; los vendedores de quesos, na corte; los de miel, nel «cortín»; los de pan, nel «fornu», y asina sucesivamente.

Ensin escaecer el túnel que xune Oteru con San Llázaro, nel que podríen allugase los artesanos al abellugu de les posibles inclemencies meteorolóxiques.

Tradición ye eternidá y nun s'herconquístase.