N'Asturies y otres partes d'España emplegóse muncho la palabra fotingu o fotingo pa designar un coche pequeñu de tipu antigu (cualquier tipu de coche pequeñu de tipu antigu) o, más bien, un cochucu, una "pota" o "cacharru". En Canaries ta güei entá la palabra mui viva pa designar un coche antigu y tamién ye un despectivu de "coche".

L'aniciu de la palabra ta en Cuba (asina que nun yer raro que s'emplegase preferentemente en zones d'emigración o negocios abondosos en Cuba). Vien de los primeros Ford, el famosu modelu T, que na so campaña de llanzamientu (1908) proclamaba: Foot it and go, esto ye, "písa-y y en marcha", porque teníen embrague (yeren los primeros coches con él), y nun había que da-y al rabil, como a los anteriores, fuera del coche y escontra él.

El seguimientu la palabra fícelu porque siempre tenía na tiesta que la mio almirada Laura González, a la que-y tengo muncha simpatía, decía que so padre paseábalos nun cochucu al qu'él llamaba "el fotingo o fotingu". Asina que cuando topé cola palabra en nes memories d'Alfonso Camín en Cuba, diome por buscar y tresmiti-y estos datos que, per otru llau, tán perdayuri na rede.

PS. Coméntame'l mio amigu Lluis Ánxel Núñez que en so casa decíen "potingo".