Nos alderiques de Intereconomía, de los que formaben parte entusiasta los que depués fueron ministros como Wert, Soria y otros --que portaren a Moncloa lo más sangrín y antiespañol del covarón mediáticu-- llamábase día sí y día non "asesín", asina d'atayante, a Zapatero y al Gobiernu, por dexar la píldora poscoital, con grande aplausu, sorrises cómplices y castañueles de los presentes.
En cualquier país vecín segárase de raigañu esta intolerable conducta, pero como equí nun se fixo agora tenemos los ministros que tenemos.
Con éses, agora llega'l casu de que médicos, personal sanitariu, asociaciones d'enfermos de cáncer, d'hepáticos, d'enfermedaes rares, avisen al Gobiernu Rajoy de que miles d'españoles, ante la disyuntiva de comer dalguna miseria o pagar les melecines vitales pa los que nun tienen dineru --los ministros sí tienen dineru, claro, y la so xente tamién, nun s'esmolezan-- van dexar de tomalos y vanse a morrer. Amás de que, direutamente, n'otros hospitales non se los recetan porque son caros y pa la Facienda actual la vida d'un español nun val una mierda, a lo que se ve. Asina que se van morrer. Tien la so lóxica. Son probes ¿non? pos que se muerran y dexen de xingar, digo de xugar cola farmacia.
Y, pregunto yo, ¿cuándo van empezar a llamalos asesinos nel Covarón? porque éstos nun torguen que nazan, non, van matalos bien vivos.