Tengo na mano los criterios d'evaluación del profesor pa, de superar positivamente esos criterios, da-y el preste lo que se vien llamando "carrera docente".
Eso criterios tán alcordaos ente l'Alministración asturiana, esto ye, el Gobiernu, el ministeriu correspondiente, los sos técnicos y los sindicatos de la enseñanza.
Pues bien, ente toos esos criterios, vamos decir ente toos esos items evaluables, nun hai ningún que contemple como un elementu positivu'l qu'un profesor investigue, publique llibros o artículos d'investigación de la so materia; tampoco'l que pinte, componga música o escriba obra de ficción. De mou y manera que l'Alministración, los sindicatos, el Gobiernu y los sos asesores (más los grupos políticos que lu caltienen y afalen) entienden que'l qu'un profesor destaque en conocimientos o actitudes de la materia qu'enseña nun val pa nada. ¡Como si pa enseñar 10 y facelo bien nun ficiera falta saber 100, polo menos!
¿Y qué ye lo que premien, lo que puntúen toos estos sabios? Pues una cosa mui cenciella, que'l profesor sea "ún d'ellos", esto ye, que comparta y faga los ritos de la relixón dominante na enseñanza (y nos intereses de los grupos dominantes del discursu sobre la enseñanza).
Cuando veo estos criterios (que son los que dominen la profesión dende Maravall, Marchesi, el Coxu Mantega y la LOGSE) nun dexo d'escaeceme de Senillosa. La nueche del 23 F, secuestráu nel Congresu, dedícábase e tomar notes y escribir nel so asientu, una vegada que pudo volver upase y sentase. Contaba él que durante tola nueche tuvo al delláu a un guardiacivil, metralleta en ristre, que nun se separó d'el nin un segundu, y que lu miraba fosqueru y con rocea.
"Seguro que lo que me facía más sospechosu qu'a tolos demás, y por eso me miraba tan mal, ye porque escribía".
¿Qué quieren que-yos diga? Cuando veo lo que piensen del profesoráu estos gobernantes y estos sindicalistes, cuando ún reflesiona sobre lo que nun quieren nin saber qu'un profesor sabe, siempre m'alcuerdo de don Antonio.
