El Gobiernu de Mariano Rajoy aprobó por Real Decreto-Llei 12/2012, de 31 de marzu un procesu de regularización fiscal, lo que popularmente conozse como una amnistía fiscal, concediendo unes condiciones tremendamente ventaxoses pa los defraudadores: tributando al diez per cientu podíen remanecer patrimonios y capitales asitiaos n'España o fora d'España. La coartada yera que d'esta forma les arques del Estáu recibiría dos mil quinientos millones d'euros que contribuyiríen a algamar l'oxetivu de déficit. Esta vegada sacrificar al divos “estabilidá presupuestaria” el principiu d'igualdá de los ciudadanos ante l'Alministración Tributaria. Nin en Salambó de Flaubert el dios cartaxinés Moloch recibiò tantes ufriendes como les que'l PP, a cuenta de los españoles, asitia ante l'altar de la nueva divinidá europea.

Nun yera la primer vegada que n'el nuesu país aprobábase una amnistía fiscal. La de 1984 impulsala Miguel Boyer y en 1991 el padrín foi Solchaga. Siempres fueron, son y van ser inxustes porque beneficien a quien incumplió les sos obligaciones fiscales y unvien un mensaxe irresponsable a la sociedá, que mayoritariamente cumple coles sos obligaciones col fiscu, estendiendo la imaxe d'impunidá de los poderosos. Por eso fueron cuestionaes polos técnicos de Facienda y, a la vista de la esperiencia d'otros Estaos europeos, tamién pola OCDE.

Pero, amás, na realidá que vive'l nuesu país, los riesgos yeren nesti momentu más elevaos que nel pasáu, tantu pol volume de fondos opacos en circulación fruto de les distintes “burbuyes” (non yá la inmobiliaria) que se producieron nos dos últimes décades como pola proliferaciónde los escándalos de corrupción consecuencia directa d'aquélles.

El Ministeriu de Facienda nun algama nin tan siquiera'l cincuenta per cientu de la previsión de recaldación (a la fin llegaron a los 1191 millones) y eso que si remanecieren los venticinco mil millones que aspirabanse acoyeren a la midida, ello namá representaría'l 2% del nuesu PIB, cuándo se calcula qu'ente'l 20% y el 25% del mesmu muévese na economía somorguiada.

Pero sí se cumplieron, una por una, toles mires negatives. A l'amnistía fiscal acoyéronse, presuntamente porque'l Gobiernu nun quier camudar la llei pa dar a conocer los beneficiarios de la midida, munchos de los implicaos nos casos de corrupción más destacaos, del Bárcenas-Gürtel al Noos, tamién con presuntes ramificaciones de les mafies ruso y chino, pel momento. Un ésitu de la midida y del Gobiernu.

La resultancia nun podía ser otru porque, como denunció l'Asociación Profesional d'Inspectores de Facienda, a pesar de les amenaces de Montoro, l'amnistía sirvió, otra vegada “presuntamente”,pal blanquéu de capitales llograos ilícitamente, porque nin siquiamente pidíase una manifestación sobre'l so orixe p'autorizala y nun s'estableció nengún tipu de control, quitando, inclusive, a los mesmos inspectores del accesu a los espedientes.

Yera inevitable porque, como los defraudadores siguíen pensando que nun corríen enforma riesgu de ser escorríos pol Gobiernu y, poro, l'amnistía nun-yos resultaba útil, l'Executivu, a la vista de les escases resultancies que taba llogrando, ameyoró la ufierta inicial rebaxando los requisitos cola Orde Ministerial 1182/2012, de 31 de mayu na qu'abría un auténticu coladeru pal blanquéu de dineru n'efectivu. Con tales “rebaxes”, multiplicaron el riesgu de blanquéu de capitales d'orixe ilícitu.

Y lo que ye peor, la reforma del artículu 180 de la Llei Xeneral Tributaria introducida nel Real Decreto-Llei 12/2012 instauró una especie d'amnistía perpetua” pa los defraudadores, al establecer que cualesquier que cometiera delitu fiscal pero regularice la so situación primero que s'empecipien actuaciones na so contra, va entendese que nunca delinquió y p'evitar que los tribunales puedan decidir otra cosa, se legislò, con absoluta desvergüenza, sentando que tales casos nun van ser comunicaos nin a xueces nin a fiscales. Si Montesquieu y la división de poderes morrieren p'Alfonso Guerra, pa Rajoy y Montoro nunca esistieron.

El Gobiernu, en cualquier Conseyu de Ministros, puede por Real Decreto modificar la normativa y abrir la vía a la publicación de la llista de los beneficiarios de l'amnistía fiscal por que la sociedá española conoza una realidá, ensin dulda, escandalosa. Y, como s'aguanta, va haber que siguir esixéndo-ylo.