Quico’l de Cuideiru anda rebotaucu estos díis,  yá non solo porque tea que dar cuentes énte’l TSJA  tres la xugada de facese aforáu, sinon porque paez que la xente nun ye tan tonta comu camentaba, y resulta que nun tan pel llabor de permiti-y al PSOE eso de nomar d’alcalde a un puntu qu’ensiquiera nun diba na llista elleutoral. Ta nerviosu y mira pa escontra tolos llaos pa ver d’onde vien eso de que los vecinos de Cuideiru nun traguen les sos cacicaes, mira pa tolos llaos y topa a Andecha Astur, y comu-y pasa a la xente “autoritario”, énte la falta de razones recurre a la fuercia: el PSOE tien munchos votos y Andecha perpocos.

Ye verdá, pero Quico sabe perbien que por munchos votos que puea tener el PSOE en Cuideiru, la más mínima sensibilidá democrática repúnase solo con camentar que pretendan imponer comu alcalde a una presona qu’ensiquiera nun se presentó a les elleiciones... y los vecinos de Cuideiru dicen-y que non, y ente los vecinos de Cuideiru hai xente d’Andecha Astur, poca xente, ye cierto, pero Quico persabe que la fuercia da’l poder, pero non la razón nin la llexitimidá.

Y anda esmolecíu viendo a Andecha Astur movese, y fai bien, porque Quico ye llistu, y sabe lo que-yos pasó al PSOE en Llanes, y comu esos pocos que somos n’Andecha Astur, aparemos-yos el PGOU, y yá mos vió ganar nel Costitucional el drechu a usar l’asturianu nes elleiciones qu’el PSOE mos ñegaba n’Asturies, o lo que ta pasando col trafullu que teníen montao en El Musel, o lo de Nicolasa, Dupont, la Zalia... sábelo y anda esmolecíu; y entendémoslu,  tien razones, y por eso dende Andecha Astur somos comprensivos, y nun mos paez mal por muncho que rinche, y tovía-y damos un conseyu: ¡respeta los principios democráticos más básicos! ¡Quico, respeta a los vecinos de Cuideiru!.

*Secretariu xeneral d’Andecha Astur