Lluis Miguel Orviz afirma que la responsabilidá de buscar el consensu «va ser de los partíos políticos en diálogu cola sociedá civil»

  La oficialidá de la llingua asturiana «va ser una realidá, tamos tocándola coles manes», afirma Lluis Miguel Orviz, responsable de Derechos Llingüísticos de Podemos Asturies, qu’añade que «agora lo importante diba ser falar d’un modelu a la asturiana, un modelu que nun dexe a naide fuera, nin a quienes la usen nin a quienes non, al marxe d’ideoloxíes y banderes». En declaraciones con motivu de la celebración de la Selmana de les Lletres Asturianes, señaló que «atopámonos nun momentu históricu, la política asturiana ta per primer vez a l’altura del nuestru patrimoniu cultural, y plantéase como oxetivu reconocer por fin la dignidá del asturiano y del gallego-asturiano».

Lluismi Miguel Orviz sostién que «ye tiempu de dexar de llau los reproches y garantizar a les asturianes y asturianos los mesmos derechos que se reconocen n’otres comunidaes onde’l PSOE y PP nun ponen dificultá nenguna a les llingües d’esos territorios». Na so opinión, «la responsabilidá de definir un modelu de consensu va ser de los partíos políticos en diálogu cola sociedá civil. Entendemos que les posibles reticencies d’una parte de la sociedá asturiana nun son tanto porque se reconoza la cooficialidá del asturiano, sinon más bien sobre lo que puea implicar la so puesta en marcha y en qué midida va afectar nes sos vides, duldes llexítimes y que tamos na obligación de resolver».

El responsable de Derechos Llingüísticos de la formación morada recuerda que «va un añu, nestes mesmes feches, dende Podemos Asturies ficimos un llamamientu al restu de formaciones polítiques y al conxuntu de la sociedá civil col fin de consensuar midíes que pongan frenu al retrocesu del idioma. Hai actuaciones concretes y bien cencielles que nos diben permitir dar pasos pa evitar la desapaición de la llingua, y una de les fundamentales ye dotar al idioma d’un marcu xurídicu afayadizu que, según la Constitución Española, nun ye otru que’l reconocimientu de la cooficialidá».

Lluis Miguel Orviz espresó l’apoyu a la manifestación pola oficialidá qu’organiza n’Uviéu la Xunta pola Defensa de la Llingua Asturiana y al actu institucional qu’entama, como tolos años, l’Academia de la Llingua Asturiana nel Teatru Campoamor esti vienres. A esos actos van dir Sofía Castañón y Segundo González, congresistes d’Unid@s Podemos, los diputaos na Xunta Xeneral Héctor Piernavieja y Andrés Fernández Vilanova, y el diputáu y secretariu xeneral de Podemos Asturies, Daniel Ripa, amás del propiu Lluis Miguel Orviz y conceyales de candidatures municipalistes asturianes.