El Conseyu Ciudadanu de Podemos Asturies fai un llamamientu a la participación na manifestación que va tener llugar esti sábadu, 21 d’abril, en defensa de la oficialidá del asturianu y del gallegu-asturianu. Esta movilización, entamada pola Xunta pola Defensa de la Llingua Asturiana y sofitada por una montonera d’organizaciones y colectivos de toa mena, nun tien otru oxetivu que pidir el reconocimientu de los derechos llingüísticos que numberoses asturianes y asturianos traten d’exercer na so vida diaria, en condiciones munches veces abegoses por mor de la inesistencia d’un marcu políticu y xurídicu que lo favoreza y lo llexitime. Asturies lleva décades esperando esi reconocimientu qu’igüe la discriminación y l’anomalía que supón que seyamos ún de los últimos territorios del Estáu onde la llingua propia nun tien estatus de llingua oficial. Negar los derechos civiles ye impropio d’una sociedá democrática y, nesi sen, dende Podemos Asturies defendimos, defendemos y vamos siguir defendiendo la llibertá qu’asiste a toa persona d’esta tierra pa usar la llingua que-y pete en tolos ámbitos públicos y privaos de la so vida.

Llamentablemente, anguaño n’Asturies hai una parte mui importante de la ciudadanía que nun puede exercer esi derechu, que nun puede disfrutar d’esa llibertá. Tamos xugándonos el modelu de sociedá que necesitamos y pola que naguamos p’afrontar los tiempos nuevos, y el nuestru modelu parte de la pluralidá y del respetu, tamién nel campu llingüísticu.

Esti sábadu vamos tener la oportunidá de reivindicar de nueves, cola llexitimidá y el compromisu qu’implica salir a la cai a comuña, el cumplimientu d’un derechu pal conxuntu de la sociedá, el reconocimientu de que l’asturianu y la so variante occidental seyan, nel so territoriu d’influencia, llingües oficiales xunto al castellanu. La oficialidá, una reivindicación que nosotres y nosotros yá llevábemos nel programa col que nos presentamos a les elecciones de 2015, ye cenciellamente una cuestión de xusticia y un reconocimientu de la historia y de la cultura d’Asturies, na que la llingua tien una presencia milenaria.

Por too esto, Podemos Asturies va tar presente, de manera activa y participativa, na manifestación, que va salir a les doce del mediudía dende la estación del Norte. Facemos un llamamientu a tola xente pa llograr qu’esta movilización seya una movilización histórica y determinante.