Refuga los recortes desendolcaos polos gobiernos asturianos y plantea midíes pa evitar la precariedá que sufre la mocedá asturiana
El Bloque de Mocedá Asturianista, mocedaes del Bloque por Asturies, critica les nueves midíes anticrisis tomaes pol gobiernu asturianu. Los recortes entamaos en xunetu por PSOE ya Izquierda Xunida y ampliaos pol gobiernu de Foro Asturias, nun son la solución contra la emigración xuvenil, la precariedá llaboral y el despoblamientu que sufren la mayoría de los conceyos asturianos.
Asturies lleva 30 años en crisis, orixinada poles polítiques neolliberales empobinaes pola Xunión Europea, defendies pol Estáu español y aplicaes sumisamente polos sucesivos gobiernos asturianos. Anguaño, la crisis ye global, y la mocedá d’Asturies pagámosla doblemente con más deslocalizaciones, EREs, pieslles d’empresa y la consecuente pérdida d’estabilidá y desarrollu de la nuestra cada vez menor población.
Poro, el Bloque de Mocedá Asturianista defende que les mismes polítiques que llevaron a la mocedá asturiana a la precariedá siguen siendo parte del problema; polo que plantea propuestes que pasen pela inversión en polítiques públiques como garantía del futuru pa la mocedá del país.
- Defensa del sector públicu:
Reforzar el sector públicu, porque ye fundamental pa garantizar l’estáu del bienestar y unos servicios de calidá accesibles pa tola ciudadanía.
- Por una educación pública y asturiana:
Completar la ufierta d’estudios universitarios inexistentes n’Asturies. Oponerse a los procesos de mercantilización de la enseñanza y a los retayos n’Educación; a la par qu’avanzar hacia un modelu asturianu d’escuela nel que s’enseñe la historia, llingua y cultura propies, pa reforzar la identidá colectiva.
- Vertebración del territoriu:
Dar más pesu a los sectores productivos rurales y meyorar el tresporte públicu y demás equipamientos ya infraestructures, col oxetivu d’evitar la pérdida de población del territorio y la concentración d’ella nes principales ciudaes.
- Pola Democracia Participativa:
Exisir una democracia real y participativa na que la ciudadanía forme parte activa na xestión de los asuntos públicos. Oposición a que’l capital financieru, multinacionales y clase política decidan sobre’l futuru de la ciudadanía.
Homenaxe a ochobre de 1934
El Bloque de Mocedá Asturianista fai estes declaraciones recordando la llucha que los antepasaos asturianos fixeron na Revolución de 1934, frutu del descontentu social y la indignación. Frente a l’actual indignación, manifiesta la so intención de siguir construyendo pa responder a los problemes de l’Asturies d’anguaño. Movilizándose, reivindicando y presentando propuestes p’algamar una Asturies con futuru
