Esixe la esistencia d’una radio y televisión pública llibre d’espilfarros y prebendes, que respete los drechos llaborales y tea al serviciu de la sociedá asturiana.

Ante l'anunciu per parte del Gobiernu de Cascos d'aprobar un amenorgamientu de 11,3 millones d'euros de les tresferencies a la TPA previstes na Llei de Presupuestos, el Bloque por Asturies  manifiesta:

1.         Refugamos tales pretensiones por significar, de facto, el zarru de la TPA, col consiguiente perxuiciu pa les empreses del sector audiovisual asturianu y la perda de centenares  de puestos de trabayu.

2.         Bloque por Asturies manifiesta'l so compromisu cola esistencia d'una radio y televisión públiques al serviciu de la sociedá asturiana, llibre de clientelismos, plural, oxetiva, na que se promocione la cultura asturiana, na que l'usu de la llingüa asturiana ocupe un  espaciu predominante, que se respeten los derechos llaborales de los sos trabayadores y que se faiga una xestión profesional, tresparente, con participación de la ciudadanía, eficaz , dotada económicamente de manera que puedan cumplise los sos oxetivos, alloñada del espilfarru actual de retresmisiones multimillonaries y prebendas  varies de los miembros del Conseyu d'Alministración qu'en nada contribúin a llograr los oxetivos equí propuestos.

3.         Bloque por Asturies anuncia'l so sofitu al Comité d'Empresa de la RTPA y a cuantes acciones entamen en defensa de la RTPA.

4.         Bloque por Asturies llama a los sos militantes y simpatizantes,  y a la sociedá asturiana en xeneral a movilizase y defender la esistencia de la RTPA, y a refugar unes midíes que van conducir al so zarru, convirtiéndose asina na punta de llanza de la ofensiva de la derecha contra'l sector públicu asturianu y les  conquistes sociales  adquiríes col pasu del tiempu.