La Conseyería d’Educación y Cultura entama dellos actos enmarcaos nel Día Internacional de la Llingua Materna, que la UNESCO celebra cada 21 de febreru.

 
Anguaño, d’alcuerdu colos oxetivos establecíos na Axenda de Desenvolvimientu Sostenible pal 2030, escoyó’l lema Caltener la diversidá llingüística y promover el plurillingüismu pa sofitar los Oxetivos de Desenvolvimientu Sostenible. Les llingües locales tresmiten cultures, valores y conocimientos tradicionales que desempeñen un papel importante na promoción d’un futuru sostenible.
 
Les actividaes empiecen mañana martes, cola collaboración del Conceyu de Nava, na Casa de Cultura Marta Portal, a les 11 hores. Ellí va desenvolvese un actu pal alumnáu de primaria de los centros públicos del conceyu onde se va ufiertar la representación deLlázaro de Tormes, al cargu de Carlos Alba, ganador del primer festival Nel Amaro de teatru profesional n’asturianu.
 
El miércoles, a la mesma hora, en collaboración col Conceyu de Samartín del Rei Aurelio, va celebrase un actu nel teatru municipal de L’Entregu pa los centros de secundaria del conceyu que se va zarrar con un conciertu de Luis Núñez y los Folganzanes, ganadores del Premiu al Meyor Cantar del 2017.
 
Esi mesmu miércoles, a les 20:30 hores, un actu na Casa de Cultura d’Avilés va zarrar les actividaes alredor del Día de la Llingua Materna. Trátase d’un conciertu abiertu al públicu en collaboración col Conceyu nel que Joaquín Pixán, acompañáu al pianu por Mario Bernardo, va interpretar una escoyeta de pieces d’Un cancioneru asturianu pal sieglu XXI.
 
Asina mesmo, publicóse n’Educastur un manifiestu n’asturianu y en gallego-asturianu destacando les ventayes d’una educación plurilingüe pa que pueda lleese a la hora del recréu del miércoles 21 de febreru.