Ricardo Soberado y Balbino Menéndez son los autores del primer métodu de gaita asturiana destináu específicamente pa rapacinos, un llibru prestosu y entreteníu
Publicaciones Ámbitu acaba de poner na cai Iniciación a la gaita asturiana,
un llibru col que los profesores Ricardo Soberado y Balbino Menéndez quieren
cubrir una necesidá qu’había nel deprendimientu de la gaita: un manual pa los rapacinos
qu’empiecen, y que sía prestosu y entreteníu. Amás, Ámbitu reedita El tambor asturiano.
Usos, rudimientos y patrones, obra de Manuel Durán García, profesor de la
Escuela Municipal de Música Tradicional Manolo Quirós d’Uviéu.
Iniciación a la gaita asturiana ye un manual dirixíu a los rapacinos d’ente siete y nueve
años y ta pensáu pa solucionar los problemes que los maestros tienen con ellos nel
día a día nel enseñu de la gaita asturiana. Ún d’esos problemes ye que ye mui fácil que
puedan llegar a aburrise por culpa de les dificultaes que tien la gaita a la hora d’empezar
con ella. Con esti llibru, Soberado y Menéndez busquen que les clases sían amenes,
dinámiques y variaes, que los neños tengan contactu cola gaita dende’l primer día
y que, anque nun toquen les canciones que se consideren convencionales de la que
s’empieza con esti instrumentu, sían quién a tener unos bonos vezos a la hora de tocar.
Esti métodu estructúrase en diez unidaes didáctiques con tres bloques temáticos
estremaos: Llinguaxe Musical, Flauta y Gaita, que, al tiempu, subdivídense nuna parte
espositiva de carácter teóricu y n’otra evaluativa con fiches d’exercicios de carácter prácticu
sobre manera. El llibru ta concebíu pa que s’use a lo llargo d’un cursu escolar, partiendo
siempre de la premisa de que la clas d’instrumentu tien asignada una hora selmanal
y que, polo tanto, el calendariu escolar dexa más o menos trenta díes llectivos
nun cursu. D’esta manera, la media ye de tres sesiones por unidá didáctica. Sicasí, pa
dar más flexibilidá a esta temporalización, a lo último del cuadernu apúrrense delles fiches
d’exercicios que van valir tanto d’actividaes d’ampliación —p’aquellos alumnos que yá
algamaren los oxetivos didácticos— como d’actividaes de refuerzu —p’aquellos que
tovía nun los algamaren—.
En cuantes a El tambor asturiano. Usos, rudimientos y patrones, el so autor, Manuel Durán
García, encóntase na so esperiencia como docente pa escribir un métodu pal aprendimientu
teóricu y prácticu d’esti instrumentu de percusión tan tradicional n’Asturies. A
lo llargo de cuasi 200 páxines, el llector va poder alcontrar, d’una manera desglosada
y progresiva, y estructuraos en niveles d’aprendimientu, los apartaos técnicos y interpretativos
que-y van permitir adquirir los conocimientos precisos p’acompañar les composiciones
interpretaes a gaita. Polo tanto, esti trabayu quier convertise nun métodu d’aprendimientu
del llamáu estilu asturianu, la forma más habitual y clásica de tocar el tambor
nel nuestru país.
El llibru inclúi una historia del tambor n’Asturies, unes páxines esplicatives de cómo garrar
los palos o poner el tambor, una esplicación de los patrones d’esquemes rítmicos –fandangu,
pasudoble, muñeira, xota...–, partitures y una compilación de semeyes de los
tamboriteros asturianos más importantes que pasaron a formar parte de la historia de
la percusión del nuestru país a lo llargo del sieglu xx. Esti métodu de tambor va más allá
de recopilar los toques más frecuentes de la música tradicional asturiana y recueye los
menos conocíos y que tuvieron a puntu de desaparecer pola falta d’usu.
Manuel García Durán inicióse nel aprendimientu del tambor en 1983 de la mano del afamáu
tamboriteru y gaiteru Pepe Blanco; depués, recibió conocimientos d’otros instrumentistes
de sonadía como José Castaño, Machacón, Ricardo Moreno, Julio Sánchez,
l’australianu Allan Chatto o l’escocés Jim Collins. Amás, Durán –que formó parte del míticu
grupu Lliberdón– ye diplomáu en percusión pola Escuela de Gaites de la Diputación
d’Ourense.
