Martes, 19 d’avientu, a les 19H.30’, nel llocal social del Atenéu Obreru de Xixón

Mañana martes, 19 d’avientu, a les 19H.30’, nel llocal social del Atenéu Obreru de Xixón (Cai Covadonga, 7 - 1o Izda.), Ástura organiza una conferencia sobre ¿Sidre asturiano o sidre d’Asturies? Sidres del mundiu, a cargu de Marcos Abel Fernández Marqués. 

¿Ye lo mesmo sidre asturiano que sidre d’Asturies? ¿La sidre que se fai n’Asturies ye sidre asturiano o namás aquello que ta fecho con mazana asturiano? Y si ye asina, ¿val con cualaquier mazana o namás con aquelles reconocíes pol Conseyu Regulaor de la Denominación d’Orixe Protexío «Sidre d’Asturies»? ¿La sidre casero ye sidre asturiano? ¿Y la sidre axampanao?

Son munchos los interrogantes que s’abren nesti campu, xenerando enforma controversia, y ye preciso que la sociedá asturiano tea nidios los conceutos, porque corremos el pelligru de perder un padremuñu material inmensu si nun somos a afitar esos términos correchamente, o lo que ye pior, permitimos qu’otros los remanen en beneficiu propiu. Per otru llau, fadráse una piqueña introdución a les «sidres del mundiu» –en función del métodu d’ellaboración y l’aniciu xeográficu de les mesmes–, continuación obligada d’esa mesma reflexón, como tendrá oportunidá de vese nel trescursu de la conferencia, y ufiertará la posibilidá de facese una idega aprosimao de lo que son les carauterístiques y la situación de les sidres nel mundiu, especialmente n’Europa. 

Marcos Abel Fernández Marqués (La Pola Llaviana, 1963) ye Llicenciáu en Melecina y Ciruxía pola Universidá d’Uviéu, Doctor y Catedráticu Principal de la Universidá 24 de Octubre de La Habana (Cuba) y Direutor Mélicu del Institutu Reumatolóxicu Asturianu. Editor d’estremaes espublizaciones periódiques (El Fielatu, Al Debalu...) y Direutor de la editorial Espublizastur qu’edita, ente otres, la publicación mensual «La Sidra» dende’l 2001 y estremaes uebs como lasidra.as. Presidente de la Fundación Asturies XXI, entamaora d’eventos como la Primer Sidre l’Añu, el Salón Internacional de les Sidres de Gala, los Premios SISGA y el Concursu Semeyes LA SIDRA.

La Conferencia finará cola tastia d’una esbilla de sidres internacional ente los asistentes y l’indispensable intercambiu d’opiniones y valoración de les mesmes. La entrada ye llibre.