Nel Tendayu del Pueblu d’Asturies van dase siete hores de talleres de baldre con bailles de Galicia, Lleón, Zamora, Cantabria, País Vascu, Aragón y Albacete

Los Alcuentros cola Tradición de Vezos Astures nacieron cola idea de facer un intercambiu cultural cola tradición d’otres partes del Estáu, pa que pudiera ponese en común cola nuestra. Y porque conocer otres tradiciones, otres músiques, otres maneres de baillar ye la meyor manera de poner en valor la tradición Asturiana y al tiempu arriquecela. La xente de Vezos Astures, esi intercambiu cultural con un grupu de baille de fuera d’Asturies, envede facelu en forma d’actuación nun escenariu, decidieron facelu en forma de taller de baille de manera que los integrantes del grupu convidáu deprendieren a los de Vezos, y a los d’otros grupos asturianos, los bailles populares de la zona d’ellos. Esti añu, al cumplir una década, los Alcuentros van cellebrase por too lo alto y envede convidar a un grupu pa facer un taller tan convidaos siete y van facer un maratón de siete hores de talleres de baille tradicional.

Los Alcuentros de Vezos tan abiertos a la participación de toles persones interesaes n’aprender a baillar, tenga o non conocimientos de baille. Los talleres son de baldre y nun fai falta inscribise primero. Esti añu van ser en Tendayu del Muséu del Pueblu d’Asturies, en Xixón, el día 4 de payares, pola mañana y de tarde. Como los Alcuentros cumplen una década esti añu la xente de Vezos convidó a repetir taller a tolos grupos que vinieren otros años y que son de los más destacaos del so territoriu:

Colectivo Brañaflor, Cantabria. 10:45 hores.

Iguao por un grupu de persones interesaes nes tradiciones que recueyen músiques, lletres, bailles y ritos de Cantabria.

Aiko Taldea, Bilbao. 11:45 hores.

Son mayestros de música y danza tradicional vasca adaptada al sieglu XXI col oxetivu de pásalo bien dende los sones populares.

Serano, Lleón. 12:45 hores.

El taller de baille llionés va llegar pola cuenta de l’Asociación de Cultura Tradicional Leonesa Serano.

Peis d’hos, Pontevedra. 13:45 hores.

La Asociación Cultural Peis d’hos vien dende Cangas (O Morrazo, Pontevedra) y van facer disfrutar de los ritmos baillables gallegos.

Bajo Duero, Zamora. 16:30 hores.

Ye un colectivu esmolecío pola recuperación del baille, la indumentaria, los cantares, instrumentos y tradición oral zamorana.

Somerondón, de Zaragoza. 17:30 hores.

Son una asociación dedicada al estudiu y difusión de les tradiciones y la indumentaria tradicional d’Aragón, van enseñar la bayura del folclore aragonés más allá de la perconocía xota

Abuela Santa Ana, d’Albacete. 18:30 hores.

Son un grupo de folklore que recueye bailles y cantos populares del so llugar, dexando pa prau les coreografíes. Nel taller d’ellos nun van faltar xotes, seguidilles y malagueñes.

Los Alcuentros de Vezos Astures siempre se rematen de nueche con una espicha, abierta tamién a la participación de tol mundu, na que se pon en práctica nun gran baille lo que s’aprendió nos talleres. La espicha ye de pagu y hai qu’acutar la entrada con Vezos primero del día 1 de payares. Va ser en Xixón nel Llagar de Castiello a les 21:30 hores.

Charra sobre «El pericote: 100 años después»

El Conceyu de Cultura Tradicional Vezos Astures ye una asociación que tien como oxetivu recoyer,  estudiar y espublizar el conxuntu de tradiciones asturianes, especialmente los aspeutos rellacionaos cola música, el baille y los elementos etnográficos que lleven acomuñaos. Nesi sen, el vienres 3 de payares, y dientro de la programación de los X Alcuentros entama una charra a les 19:30 hores, nel centru municipal Xixón-Sur que tien por títulu «El pericote 100 años después» y na que van intervenir Yolanda Cerra y Santiago Galguera.

Nesta charra Yolanda Cerra va repasar cróniques históriques referíes al Pericote pa dir desplicando cómo foi cambiando col tiempu  esti baille y la so visión sociolóxica y histórica. Pela so parte, Santi Galguera fadrá, depués de ver dellos vídeos antiguos, un análisis de los aspeutos musicolóxicos de los bailles grabaos desplicando la rellación ente versiones, la evolución al traviés del tiempu,y les modalidaes xeográfiques del baille, la instrumentación y los sones.