La gala va entamar a les 20:00 hores y la entrada ye llibre hasta completar aforu. Hai de  retirar les invitaciones a partir de les 11:00 hores de güei miércoles 27 de setiembre,  na Casa la Cultura y el vienres 29 dende les 18:00 hores na taquilla del teatru.

Los cuatro finalistes son los que vienen darréu:

-Luis Núñez y los Folgazanes: La ñeve y la esperanza

-Hoboken Band: Sonrises nel cielu

-Bras Rodrigo: Naquel malecón

-Odeón del Paganéu: Soi ya vengu de Tinéu / La inconformidá

La gala va emitise en direutu por TPA, actuando tolos finalistes amás d'Anabel Santiago qu'algamó'l premiu l'añu pasáu col tema La lloca. El públicu recibirá un discu conmemorativu d'esta edición.

El Gobiernu d'Asturies convoca dende l'añu 2017 el Premiu al Meyor Cantar p'afitar, dar nome y puxu a la creación musical en llingua asturiana y en gallego-asturianu. Al intérprete o grupu ganador daráse-y una escultura orixinal de l'artista María Jesús Rodríguez. El Principáu tamién cuidará la promoción y l'espardimientu de la canción nos medios de comunicación y nos eventos organizaos o entamaos por él.

Luis Núñez y los Folganzanes, con La ñeve y la esmeralda (lletra y música: Luis Núñez)

La banda de Luis Núñez y los Folganzanes llega a la final del Premiu al Meyor Cantar con un tema del so segundu discu, Xuro nun tornar, dempués d'El cantar del folganzán, álbum espublizáu en 2013. La formación, que se mueve nos parámetros del folk-rock, tien de cabezaleru a Luis Núñez y a los músicos Arturo Ávila (percusión), Marcos Díaz (baxu), Diego Infiesta (guitarra), Armando Fernández (teclaos) y Rubén Alba (gaita y whistle).  

Bras Rodrigo, con Naquel malecón (lletra y música: Bras Rodrigo)

El maestru gaiteru Bras Rodrigo, profesor y direutor de bandes como les de Corvera, Lluanco o Gozón, premiáu en dellos concursos de la so especialidá, percorrió'l mundu enteru y participó en munches grabaciones d'otros artistes. Tien dos álbumes nos que toca solu Xermandía (2005) y A pause in New York (2016), el so últimu trabayu onde ta'l tema finalista Naquel malecón.  

Hoboken Band, con Sonrises nel cielu (lletra y música: César González Herrerías)

Hoboken Band lleva dos años diendo d'un sitiu pa otru, munches actuaciones en direutu y un discu que tien de títulu'l nome la banda. La so propuesta garra fuerza con una base instrumental clásica del pop-rock col banyu y les armoníes vocales del folk. César González Herrerías (guitarra), José Ramón Granda (baxu), Jesús Braña (batería), Jorge Remis (guitarra) y Diego Rodríguez Infiesta (banyu) son los sos componentes.

Odón del Paganéu, con Soi ya vengu de Tinéu / La inconformidá (lletra y música: Odón García González)

Odón del Paganéu, nome artísticu del músicu de Tinéu, Odón García González, participa na final del Premiu al Meyor Cantar col tema Soi ya vengu de Tinéu / La inconformidá. La lletra ye d'él mesmu. Odón formóse vocalmente con cantantes como Anabel Santiago, Mapi Quintana o Joaquín Pixán y participó en munchos concursos de canción asturiana, amás de poner la so voz en grupos como Albastur Cultural Exchange o L’aldu.

 

Xuráu del premiu

El xuráu del X Premiu al Meyor Cantar  ta formáu poles eprsones que vienen darréu:

Presidente:

-Fernando Padilla, direutor xeneral de Planificación Llingüística y Normalización.

Vocales:

-Amparo Antuña, direutora del Conservatoriu de Música de Sotrondio.

-José Aurelio García, críticu musical.

-Ismael Mª González, direutor de la Casa la Cultura de Mieres y escritor.

-Marta Mori, escritora y vicepresidenta de l'Academia de la Llingua Asturiana.

-Montserrat Machicado, responsable de la Estaya de la Llingua del Conceyu  d'Avilés.

Secretaria:

-Lourdes Álvarez, responsable de promoción del asturianu nel Serviciu de Planificación Llingüística y Normalización.