Xixón.-La carpa montada na cai Tomás y Valiente de Xixón quedó pequeña p’acoyer a les persones que, en representación de toles estayes de la sociedá, acudieron esti sábadu al mediudía al actu qu’entamó la Xunta pola Defensa de la Llingua Asturiana pa presentar el Proyectu Oficialidá 2018. Taben ente los asistentes Daniel Ripa, diputáu y secretariu xeneral de Podemos Asturies; Sofía Castañón, diputada asturiana d’Unid@s Podemos; Daniel Fernández Vilanova, diputáu de Podemos Asturies, y el portavoz parlamentariu del partíu moráu nel Parlamentu asturianu, Emilio León, qu’intervieno dende la tribuna d’oradores pa dicir que «queremos formar parte d’una modernización de les nuestres instituciones que nun dexe atrás los nuestros derechos llingüísticos porque, ente otres munches coses, queremos poder pronunciar la nuestra tierra col mesmu idioma col que falaben les nuestres güeles y güelos».
Emilio León llamentó que «hoi en día tengamos que reclamar que se cumpla la llei en tantos ámbitos que conciernen a derechos fundamentales. Munchos derechos tán recoyios na normativa actual y nun se tán cumpliendo. El marcu xurídicu constitucional fálanos tanto del derechu a un empléu dignu como del respetu a la diversidá llingüística nos diferentes territorios. Paez mentira que hoi en día tengamos que demandar que se desenvuelva y aplique la normativa vixente, que se garantice la enseñanza del asturianu o la so visibilidá nos medios de comunicación asturianos de titularidá pública».
Dexó claro que «nun tamos equí pa recordar la falta de respetu polos derechos llingüísticos básicos o pa esixir el cumplimientu de la normativa existente», sinon pa «impulsar una movilización ciudadana qu’impida que se siga negando cola cabeza lo que la razón ya nun puede negar. Nesta estación de salida tamos persones representantes de munches sensibilidaes, porque la nuestra llingua nun ye’l xuguete de naide. D’esta estación parte un tren de derechos que ha de sumar vagones nos qu’atopen acomodu los actores más plurales. Confiamos qu’esta vez sí se sumen incluso aquellos que sacaben pechu pa desinflase nada más pasar la correspondiente fiesta de guardar».
Amás d’Emilio León, nel actu intervinieron la diputada d’IU Concha Masa y el diputáu de Foro Pedro Leal; el rector de la Universidá d’Uviéu, Santiago García Granda; la alcaldesa de Xixón, Carmen Moriyón, y el portavoz de la Xunta pola Defensa de la Llingua Asturiana, Carlos Pulgar. Ente los asistentes taben Mario Suárez del Fueyo, portavoz municipal de Xixón Sí Puede; y los conceyales Fernando Villacampa, de Somos Uviéu; Xune Elipe, de Somos Avilés; Carlos López, de Somos Carreño y Patricia Díaz Baizán, de Xente por Ayer, asina como Iván García Caso, secretariu xeneral de Podemos Siero.
