El próximu domingu 17 de setiembre (Plaza de la Catedral d'Uviéu, 01:00 h.) Dixebra va celebrar el so XXX Aniversariu con un conciertu mui especial. El mesmu, incluyíu dientro de la programación de les fiestes patronales uviedines, va convertise na actuación conmemorativa d'estes tres décades d'activismu musical. Nél van contar cola collaboración de dellos de los intérpretes más renomaos de la escena musical asturiana, como ye'l casu de los hermanos Tejedor (gaita y acordión), Rubén Bada (buzuqui y violín), Ángel Ruíz (banjo) y Toño Gómez (trombón). Con ello quieren volver a repetir l'espectáculu que presentaben na pasada edición del Festival Intercélticu de Lorient, onde llograron un gran éxitu. Estes incorporaciones faen que los temes clásicos de la banda avilesina suenen con un aire distinto, onde a la fuercia avezada nella xúntase la elegancia y el timbre folki de los instrumentos acústicos. El repertoriu va tar compuestu por dellos de los temes más conocíos qu'apaecen nos sos doce discos publicaos hasta'l momentu, amás de dalgún inéditu.

La intención que tienen ye la de grabar esti conciertu col proyectu d'asoleyar un DVD con él y con más conteníos pa conmemorar la so llarga trayectoria. Los miembros de Dixebra llamen a tolos y toles sos siguidores a participar activamente nesti conciertu pa que lu faigan más vistosu y memorable.

Esti va ser l'actu central de la serie d'actividaes entamaes por cuenta del XXX Aniversariu, onde destaquen la xira Tour 87-17 que los llevó esti branu a tocar per bien de llugares de toa Asturies (Piloña, Mieres, Llangréu, Siero, Avilés, Xixón, Llaviana, Quirós, Ribeseya, Llanera, Corvera, Llanes, El Franco o L.lena) y de fuera (Galicia, Cantabria o Bretaña); la edición esclusiva d'una tirada de 500 botelles de sidra con una etiqueta conmemorativa; o'l proyectu tituláu Dalgo nuevo, dalgo vieyo, dalgo emprestao, consistente na grabación de tres video-clips con un tema nuevu («Sigue'l tren»), otru vieyu (nun primer momentu diba ser «Da-yos caña» pero finalmente l'escoyíu ye «Esto ye Asturies») y una versión («Adiós, Cordera», una pieza de la formación británica Oyster Band basada nuna canción tradicional irlandesa).