La entrega del gallardón, depués de l’actuación de los cuatro finalistes, va celebrase’l 29 de setiembre nel Teatru Palacio Valdés d’Avilés.

Avilés va acoyer el vienres 29 de setiembre la décima edición del Premiu al Meyor Cantar. El Teatru Palacio Valdés va ser l’escenariu onde los cuatro finalistes actúen pa que’l xuráu, formáu por especialistes en música y llingua asturiana, decida’l cantar ganador. Tres d’una primer selección fecha nel mes d’agostu, los cuatro candidatos pa la final son los grupos Hoboken Band y Luis Núñez y los Folganzanes, amás de los músicos Odón del Paganéu y Bras Rodrigo, toos ellos con trabayos discográficos editaos nel añu 2016. Na gala, que se va emitir na TPA, tamién va ufiertar un conciertu Anabel Santiago, ganadora de la edición anterior del Premiu col tema «La lloca».

El Premiu al Meyor Cantar convócalu’l Gobiernu del Principáu d’Asturies coles mires de consolidar, prestixar y arriquecer la creación musical tanto n’asturianu como en gallego-asturianu.

Los cuatro finalistes son:

Luis Núñez y los Folganzanes, con «La ñeve y l’esmeralda» (lletra y música: Luis Núñez)

La banda de Luis Núñez y los Folganzanes llega a la final del Premiu al Meyor Cantar con un tema del so segundu discu, Xuro nun tornar, depués d’El cantar del folganzán, álbum publicáu nel 2013. La formación, que se mueve nos parámetros del folk-rock, ta liderada por Luis Núñez y cunta colos músicos Arturo Ávila (percusión), Marcos Díaz (baxu), Diego Infiesta (guitarra), Armando Fernández (teclaos) y Rubén Alba (gaita y whistle). 

Bras Rodrigo, con «Naquel malecón» (lletra y música: Bras Rodrigo)

El maestru gaiteru Bras Rodrigo, profesor y director de bandes como les de Corvera, Lluanco o Gozón, premiáu en dellos concursos de la so especialidá, percorrió’l mundu enteru y participó en bien de grabaciones d’otros artistes. Tien dos álbumes en solitario: Xermandía (2005) y A pause in New York (2016), el so postrer trabayu, onde apaez el tema cantáu «Naquel malecón», finalista del Premiu al Meyor Cantar.  

Hoboken Band, con «Sonrises nel cielu» (lletra y música: César González Herrerías)

Hoboken Band lleva dos años d’andadura, munches actuaciones en directo y un discu nel so haber tituláu col nome de la banda. La so propuesta arriquez una base instrumental clásica del pop-rock col banjo y les harmoníes vocales del folk. César González Herrerías (guitarra), José Ramón Granda (baxu), Jesús Braña (batería), Jorge Remis (guitarra) y Diego Rodríguez Infiesta (banjo) son los sos componentes.

Odón del Paganéu, con «Soi ya vengu de Tinéu / La inconformidá» (lletra y música: Odón García González)

Odón del Paganéu, nome artísticu del músicu de Tinéu Odón García González, participa na final del Premiu al Meyor Cantar col tema «Soi ya vengu de Tinéu / La inconformidá», con lletra de la so autoría. Odón recibió formación vocal de cantantes como Anabel Santiago, Mapi Quintana o Joaquín Pixán y tien participao en bien de concursos de canción asturiana, amás de poner la so voz en grupos como Albastur Cultural Exchange o L’aldu.