L’únicu periódicu escritu íntegramente n’asturianu empezó a publicase en 1996 y, d’entós p’acá, nun dexó de faltar una selmana a la so cita colos llectores

LES NOTICIES, l'únicu periódicu impresu escritu n'asturianu, publica esti vienres 7 d'ochobre un númberu especial pa celebrar 15 años de presencia de contino nos quioscos de toa Asturies. Trátase d'un númberu especial de 32 páxines a tou color que s'abre con una entrevista n'esclusiva a Francisco Álvarez-Cascos, presidente del Gobiernu asturianu, onde analiza la situación actual del país y les espectatives de la so formación pa les elecciones del 20 de payares.

Per otru llau, nesta edición d'aniversariu inclúinse dellos reportaxes onde s'analiza'l poder d'influencia qu'algamó l'asturianismu nos últimos años, la presencia del nuestru idioma nos medios de comunicación –dende l'aparición d'Ixuxú, en 1901, hasta anguaño–, un análisis sobre la situación actual de los estudios d’asturianu na Universidá, la evolución del nacionalismu asturianu contestualizao con otros movimientos asemeyaos n’Europa y nel Estáu español o les perspectives de futuru del sector agroalimentariu asturianu.

Otra manera, na sección Cultura dellos artículos analicen la evolución de la lliteratura y la música asturiana a lo llargo d'estos 15 años. Estos son dalgunos de los conteníos que van poder alcontrase nesti númberu col que se quier conmemorar 15 años de fidelidá cola llingua asturiana y colos llectores.