El próximu martes 8 d'agostu Dixebra vuelve al Festival Intercélticu de Lorient, no que va ser la so octava actuación nesti perimportante eventu musical.

El conciertu va desenvolvese nel escenariu central, nel denomináu Espace Marine, con capacidá pa 8.000 persones y per onde van pasar esti añu artistes de la talla de Capercaillie, Luar na Lubre, Hevia o Amy Macdonald.

Nesta ocasión el conciertu que van ufiertar los avilesinos va convertise nun espectáculu especial pola collaboración de dellos músicos invitaos que van realzar tovía más la so puesta n'escena. Asina, van salir al escenariu los hermanos Tejedor (gaita y acordión), Rubén Bada (violín y buzuqui) y Toño Gómez (trombón), que van interpretar bona parte del repertoriu escoyíu cuidadosamente y acordies col calter del festival. Nesti sen, el set list que van interpretar incide de manera especial nos temes más folk-rock de la banda, que van ver reforzáu esti soníu coles aportaciones d'estos músicos destacaos de la escena musical asturiana. A ello hai qu'añadir la collaboración especial en delles pieces de la Bagad de Lorient, una de les bandes de gaites más importantes de Bretaña y actual campeona del concursu de bagadou, el de mayor prestixu d'esti tipu de formaciones; ta formada por más de cuarenta intérpretes ente gaites, bombardes y percusiones, y tien collaborao con artistes de renome como Alan Stivell.

Esti conciertu va representar un momentu irrepetible y vien a sumase a les celebraciones que Dixebra ta entamando pol so trenta aniversariu. Previamente a él van actuar nel festival Sauga Folk de Colindres (Cantabria) esti sábadu que vien, xunto a una formación mítica de la música celta como son los veteranos Gwendal.