La interculturalidá y la música popular marquen a esti EP formáu por cinco cantares qu’amesten folk, jazz y baião con gaita

Yá ta disponible en toles plataformes dixitales musicales ‘Slum Suit’, el debut homónimu d’esta banda neoyorquina formada pol gaiteru uvieín Carlos Casado xunto a otros cinco músicos de Brasil, Turquía, Xapón y Cataluña. Un discu carácterizáu polos contrastes que definieron a Slum Suit (traxe de les barriaes) como un grupu qu’entemez la elegancia de lo popular cola identidá y la interculturalidá, convirtiendo a la gaita nel puntu d’alcuentru.

Slum Suit naz en 2015 cuando Carlos Casado (Uviéu, 1987) reunió a dellos músicos –que nin tan siquiera vieren enantes una gaita- con un oxetivu: crear un soníu popular, modernu y tradicional que naciera de los instrumentos de persones mui alloñaes xeográficamente, pero qu’amosara que yera posible entendese ente cultures. Algamáronlo. Tres enganchar al públicu cola so orixinalidá y cuidáu directu en sales, teatros, estaciones de metro, parques, prestixosos festivales como’l Harrison Fest de New Jersey… presenten agora’l so EP.

‘Slum Suit’ son cinco temes que nun tienen lletra pero sí historia: les vivencies de seis inmigrantes na ciudá qu’enxamás duerme. Col protagonismu de la gaita y el folk, cada pieza d’esti trabayu ye un viaxe sonoru que tresporta hacia ritmos jazz, a guitarres rumberes, al baião de Brasil, a llínies musicales d’Oriente Mediu. Un impecable debut que lleva a la música de raigañu asturianu a territorios enxamás esploraos enantes, que ruempe con prexuicios culturales de toa triba y algama empastiar estos soníos de contraste. L’arguyu de lo propio y la guapura de lo estremao vistiendo’l traxe de les barriaes.

Editáu por Celtiberian Heritage Society, el discu yá ta disponible en formatu dixital en toles plataformes musicales –Spotify, iTunes, Google Play…- y les copies físiques van tar distribuyíes en dellos llocales d’Asturies a mediaos de xunu. Cola publicación d’esti álbum, Carlos Casado ye quien a dar un pasu más nel so enfotu por visibilizar la música asturiana n’Estaos Uníos, algo que yá fixo fundando fai dos años La Mecigaya (primera banda gaites asturianes d’Estaos Uníos) y tocando nel grupu asturxaponés Fuxida.

Actuación cola Filarmónica de NY

El próximu 15 xunu va ser la presentación oficial d’esti EP con un conciertu mui especial nel Cunningham Park. Slum Suit van actuar xunto a la renomada Orquesta Filarmónica de Nueva York representando a Queens –barriu onde viven tolos sos componentes-, tres ser seleccionaos por The New World Iniciative, un proyectu col qu’esta orquesta celebra los sos 175 años d’historia actuando coles bandes fusión a les que seleccionaron pola so reinterpretación de la pieza “Dvo?ák’s Symphony No. 9, From the New World”.